اقوردادا پرەزيدەنت قاسىم-جومارت توقاەۆتىڭ تٶراعالىعىمەن عىلىم جەنە تەحنولوگييالار جٶنٸندەگٸ ۇلتتىق كەڭەستٸڭ وتىرىسى ٶتٸپ جاتىر, دەپ حابارلايدى "ۇلت اقپارات".
الدىمەن, بارشاڭىزدى عىلىم كٷنٸمەن شىن جٷرەكتەن قۇتتىقتايمىن! سٸزدەر ارقىلى قازاقستان عالىمدارىنا جىلى لەبٸزٸمدٸ جەتكٸزگٸم كەلەدٸ. شىن مەنٸندە, بٷگٸنگٸ مەرەكەلٸك كٷن – قوعامىمىزداعى ەرەكشە سەت, سەبەبٸ بۇل كٷن عۇلاما عالىم, زاڭعار تۇلعا قانىش سەتباەۆتىڭ تۋعان كٷنٸمەن تۇسپا-تۇس كەلٸپ وتىر. دەل بٷگٸن اكادەميك قانىش سەتباەۆتىڭ تۋعانىنا 125 جىل تولدى. بٸز ۇلى ابايدى قازاق رۋحانيياتىنىڭ تەمٸرقازىعى, احمەت بايتۇرسىنۇلىن ۇلت ۇستازى دەيمٸز. ال قانىش سەتباەۆتى قازٸرگٸ قازاق عىلىمىنىڭ اتاسى دەۋگە بولادى.
ٶزدەرٸڭٸز بٸلەسٸزدەر, قانىش يمانتايۇلى سەتباەۆ – حالقىمىزدىڭ بٸرتۋار پەرزەنتٸ. ەلٸمٸز ەلٸ كٷنگە دەيٸن ونىڭ عىلىمي جاڭالىقتارىنىڭ يگٸلٸگٸن كٶرٸپ وتىر. ەيگٸلٸ عالىمنىڭ مەرەيتويىن جوعارى دەڭگەيدە اتاپ ٶتۋ ماڭىزدى.
مەنٸڭ تاپسىرماممەن كٶپتەگەن ٸس-شارا ٶتكٸزٸلەدٸ. بٸز, بٸر جاعىنان, ۇلى عالىمعا شىنايى قۇرمەت كٶرسەتەمٸز. ەكٸنشٸ جاعىنان, بٸلٸم-عىلىم كۋلتٸن قالىپتاستىرۋ جولىندا ماڭىزدى قادام جاسايمىز. ەڭ باستىسى, ەلٸمٸز سەتباەۆ سالعان سارا جولدى جالعاستىرۋى قاجەت.
بٸز «عىلىم» تۋرالى سٶز قوزعاعاندا, ەڭ الدىمەن, ۇلى عالىم قانىش سەتباەۆتىڭ ەسٸمٸ ويعا ورالادى. بۇل – زاڭدىلىق. مەملەكەتتٸك مەرتەبەسٸن قايتا يەلەنگەن ۇلتتىق عىلىم اكادەميياسى ەلٸمٸز عانا ەمەس, بٷكٸل ەلەمنٸڭ عىلىمي قاۋىمداستىعى ماقتان تۇتاتىن قانىش سەتباەۆتىڭ ەسٸمٸمەن تىعىز بايلانىستى. بۇل كەزدەيسوقتىق ەمەس, - دەدٸ پرەزيدەنت.
