Talapkerlerdiń 70%-ǵa jýyǵy qańtar aiyndaǵy UBT-da shekti ball jinady. Bul byltyrmen salystyrǵanda 20%-ǵa joǵary. Al ortasha balǵa keletin bolsaq, bul kórsetkish 7%-ǵa artyp, shamamen 68 baldy qurady. Eń joǵary ball 135 boldy, dep habarlaidy "Ult aqparat" BǴM baspasóz qyzmetine silteme jasap.
Qańtardaǵy ulttyq biryńǵai testileýge barlyǵy 102 myńǵa jýyq adam qatysty. Onyń ishinde túlekterdiń 78,3%-y qazaq tilinde, 21,5%-y orys tilinde, 0,16%-y aǵylshyn tilinde testileýden ótti.
Qańtar aiyndaǵy UBT-ǵa erekshe bilim berýdi qajet etetin 99 bala qatysty. Byltyr osy kezeńde kórý, estý, tirek-qimyl apparaty buzylǵan 33 talapker test tapsyrǵan bolatyn.
Aita ketetini, biyl alǵash ret erekshe qajettilikteri bar túlekterge testileý tapsyrmalaryn oryndaý úshin negizgi 240 minýttan bólek, taǵy qosymsha 40 minýt ýaqyt berildi. Sonymen qatar osy túlekter úshin syzbalarsyz, diagrammalarsyz jáne shemalarsyz test nusqalary arnaiy ázirlendi.
«Qańtardaǵy UBT biylǵy 25 qańtar men 22 aqpan aralyǵynda 42 óńirlik testileý ortalyǵynda ótti. Testileý osymen ekinshi jyl qatarynan elektrondy formatta júrgizilip keledi. Testileý kezinde talapkerler suraqtarǵa qaita orala alady jáne qaǵaz blank toltyrýǵa ýaqyt jumsamaidy. Osylaisha, UBT nátijeleri jaqsaryp, ortasha ball aitarlyqtai ósti. Sondai-aq elektrondy format testileýdiń ashyqtyǵyn qamtamasyz etýge múmkindik berdi. Ornatylǵan kameralardyń arqasynda testileý kezinde ereje buzý faktileri de aitarlyqtai azaidy. Túlekterdiń basym bóligi ózine jáne óz bilimine senetini qýantady», – deidi Ulttyq testileý ortalyǵynyń direktory Rýslan Emelbaev.
Byltyrǵy qańtar aiyndaǵy UBT-men salystyrǵanda tyiym salynǵan zattardy alyp kirý áreketteriniń sany da azaiǵan. Smartfondardy, shpargalkalardy jáne basqa da tyiym salynǵan zattardy alyp ótý áreketi saldarynan testileýden ótý múmkindiginen 90 talapker aiyryldy. Bul 2021 jylmen salystyrǵanda úsh esege az.
Esterińizge sala keteiik, UBT úsh deńgeili júie boiynsha ótkiziledi: Face ID jeke basyn sáikestendirý arqyly, jeke kýálik boiynsha, sondai-aq testileý ornynda jeke basyn sáikestendirý júrgiziledi. Biyl testileý alǵash ret «bir kompiýter – eki kamera – bir testileýshi» qaǵidasy boiynsha ótkizildi. Eger buryn testileý barysy ár kompiýterdiń ústinde ornalasqan bir ǵana kameradan baqylansa, endi UBT kezinde jeke tulǵany sáikestendirýge jáne bógde adamdardyń kirýine jol bermeýge múmkindik beretin ekinshi (aldyńǵy) kamera ornatyldy. Testileý kezinde erejelerdi buzǵany úshin aýditoriiadan barlyǵy 229 adam shyǵarylyp, olardyń nátijeleri joiyldy.
