Foto: Ǵylym jáne joǵary bilim ministrligi
Búgin qańtar aiynda ótetin Ulttyq biryńǵai testileý (UBT) bastaldy. Ol 10 aqpanǵa deiin jalǵasady, dep habarlaidy Ǵylym jáne joǵary bilim ministrligi.
Biyl UBT-ǵa 187 myńǵa jýyq adam qatysýǵa ótinish bergen. Bul ótken jylmen salystyrǵanda 20 myńǵa kóp. Testileýge tirkelgen talapkerlerdiń 75,2%-y qazaq tilinde, 24,6%-y orys tilinde, al 189 adam aǵylshyn tilinde tapsyrýdy tańdaǵan.
Ministrlik málimetinshe, talapkerler ótinish berý barysynda testileý kúnin, ýaqytyn jáne pýnktin ózderi tańdaǵan.
Eń kóp tańdalǵan beiindik pánder kombinatsiiasy – «Matematika-fizika». Bul baǵytty talapkerlerdiń 19,2%-y tańdaǵan. Atalǵan kombinatsiia bolashaq muǵalimder, injenerler, mehanikter, tehnikter men tehnologtar, energetikter men qurylysshylardy daiarlaýǵa baǵyttalǵan.
Al 16,9% talapker «Biologiia-himiia», 9,7% talapker «Shyǵarmashylyq emtihan» pánderin tańdaǵan. Bul sáikesinshe meditsinalyq jáne shyǵarmashylyq sala mamandyqtaryna túsýge nietti talapkerler.
UBT barysynda kalkýliator, Himiialyq elementterdiń periodtyq júiesi (Mendeleev kestesi) jáne tuzdardyń erigishtik kestesi testileý baǵdarlamasynda qoljetimdi bolady. Testileý aiaqtalǵannan keiin talapkerler 30 minýt ishinde apelliatsiiaǵa ótinish bere alady. Apelliatsiiaǵa ótinish bergen talapkerlerdiń sertifikaty apelliatsiialyq komissiia sheshiminen keiin jeke kabinetinde jariialanady.
2026 jyly Ulttyq biryńǵai testileýdiń formaty ózgerissiz qalady. Talapkerler úsh mindetti pán men eki beiindik pándi tapsyrady.
UBT tapsyrmalarynyń jalpy sany – 120. Onyń ishinde «Qazaqstan tarihy» páni boiynsha 20 tapsyrma, «Oqý saýattylyǵy» men «Matematikalyq saýattylyq» pánderinen 10 tapsyrmadan, sondai-aq eki beiindik pánniń árqaisysynan 40 tapsyrmadan beriledi.
Eń joǵary ball – 140.
Testileý ýaqyty 4 saǵatty (240 minýt) quraidy. Erekshe bilim berý qajettilikteri bar talapkerler úshin qosymsha 40 minýt ýaqyt qarastyrylǵan.
Aita keteiik, qańtardaǵy UBT-ǵa shartty túrde aqyly negizde kúndizgi oqý nysany boiynsha joǵary oqý oryndaryna qabyldanǵandar, shyǵarmashylyq bilim berý baǵdarlamalarynan basqa daiyndyq baǵyttaryna nemese pedagogikalyq baǵytqa aqyly negizde aýysqysy keletinder, ótken jylǵy mektep pen kolledj túlekteri, QR azamaty bolyp tabylmaityn ulty qazaq tulǵalar, shetelde bilim alǵan QR azamattary, sondai-aq mektep bitiretin túlekter joǵary oqý oryndaryna aqyly negizde túsý úshin qatysady.
