فوتو: عىلىم جەنە جوعارى بٸلٸم مينيسترلٸگٸ
بٷگٸن قاڭتار ايىندا ٶتەتٸن ۇلتتىق بٸرىڭعاي تەستٸلەۋ (ۇبت) باستالدى. ول 10 اقپانعا دەيٸن جالعاسادى, دەپ حابارلايدى عىلىم جەنە جوعارى بٸلٸم مينيسترلٸگٸ.
بيىل ۇبت-عا 187 مىڭعا جۋىق ادام قاتىسۋعا ٶتٸنٸش بەرگەن. بۇل ٶتكەن جىلمەن سالىستىرعاندا 20 مىڭعا كٶپ. تەستٸلەۋگە تٸركەلگەن تالاپكەرلەردٸڭ 75,2%-ى قازاق تٸلٸندە, 24,6%-ى ورىس تٸلٸندە, ال 189 ادام اعىلشىن تٸلٸندە تاپسىرۋدى تاڭداعان.
مينيسترلٸك مەلٸمەتٸنشە, تالاپكەرلەر ٶتٸنٸش بەرۋ بارىسىندا تەستٸلەۋ كٷنٸن, ۋاقىتىن جەنە پۋنكتٸن ٶزدەرٸ تاڭداعان.
ەڭ كٶپ تاڭدالعان بەيٸندٸك پەندەر كومبيناتسيياسى – «ماتەماتيكا-فيزيكا». بۇل باعىتتى تالاپكەرلەردٸڭ 19,2%-ى تاڭداعان. اتالعان كومبيناتسييا بولاشاق مۇعالٸمدەر, ينجەنەرلەر, مەحانيكتەر, تەحنيكتەر مەن تەحنولوگتار, ەنەرگەتيكتەر مەن قۇرىلىسشىلاردى دايارلاۋعا باعىتتالعان.
ال 16,9% تالاپكەر «بيولوگييا-حيمييا», 9,7% تالاپكەر «شىعارماشىلىق ەمتيحان» پەندەرٸن تاڭداعان. بۇل سەيكەسٸنشە مەديتسينالىق جەنە شىعارماشىلىق سالا ماماندىقتارىنا تٷسۋگە نيەتتٸ تالاپكەرلەر.
ۇبت بارىسىندا كالكۋلياتور, حيمييالىق ەلەمەنتتەردٸڭ پەريودتىق جٷيەسٸ (مەندەلەەۆ كەستەسٸ) جەنە تۇزداردىڭ ەرٸگٸشتٸك كەستەسٸ تەستٸلەۋ باعدارلاماسىندا قولجەتٸمدٸ بولادى. تەستٸلەۋ اياقتالعاننان كەيٸن تالاپكەرلەر 30 مينۋت ٸشٸندە اپەللياتسيياعا ٶتٸنٸش بەرە الادى. اپەللياتسيياعا ٶتٸنٸش بەرگەن تالاپكەرلەردٸڭ سەرتيفيكاتى اپەللياتسييالىق كوميسسييا شەشٸمٸنەن كەيٸن جەكە كابينەتٸندە جارييالانادى.
2026 جىلى ۇلتتىق بٸرىڭعاي تەستٸلەۋدٸڭ فورماتى ٶزگەرٸسسٸز قالادى. تالاپكەرلەر ٷش مٸندەتتٸ پەن مەن ەكٸ بەيٸندٸك پەندٸ تاپسىرادى.
ۇبت تاپسىرمالارىنىڭ جالپى سانى – 120. ونىڭ ٸشٸندە «قازاقستان تاريحى» پەنٸ بويىنشا 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پەندەرٸنەن 10 تاپسىرمادان, سونداي-اق ەكٸ بەيٸندٸك پەننٸڭ ەرقايسىسىنان 40 تاپسىرمادان بەرٸلەدٸ.
ەڭ جوعارى بالل – 140.
تەستٸلەۋ ۋاقىتى 4 ساعاتتى (240 مينۋت) قۇرايدى. ەرەكشە بٸلٸم بەرۋ قاجەتتٸلٸكتەرٸ بار تالاپكەرلەر ٷشٸن قوسىمشا 40 مينۋت ۋاقىت قاراستىرىلعان.
ايتا كەتەيٸك, قاڭتارداعى ۇبت-عا شارتتى تٷردە اقىلى نەگٸزدە كٷندٸزگٸ وقۋ نىسانى بويىنشا جوعارى وقۋ ورىندارىنا قابىلدانعاندار, شىعارماشىلىق بٸلٸم بەرۋ باعدارلامالارىنان باسقا دايىندىق باعىتتارىنا نەمەسە پەداگوگيكالىق باعىتقا اقىلى نەگٸزدە اۋىسقىسى كەلەتٸندەر, ٶتكەن جىلعى مەكتەپ پەن كوللەدج تٷلەكتەرٸ, قر ازاماتى بولىپ تابىلمايتىن ۇلتى قازاق تۇلعالار, شەتەلدە بٸلٸم العان قر ازاماتتارى, سونداي-اق مەكتەپ بٸتٸرەتٸن تٷلەكتەر جوعارى وقۋ ورىندارىنا اقىلى نەگٸزدە تٷسۋ ٷشٸن قاتىسادى.
