Qazaqstandaǵy adam quqyqtary jónindegi ýákil Elvira Ázimova qańtar oqiǵasyna bailanysty tergeý kezinde kúiik jaraqatyn alǵandardyń isi týraly pikir bildirdi, dep habarlaidy QazAqparat.
«Almaty oblysy men qalasynda birneshe azamattyń, onyń ishinde kámeletke tolmaǵan balalardyń denesine kúiik jaraqaty túskeni týraly málimetter rezonans týǵyzdy. Onyń bári qazir eshqaida ketpeý týraly qolhat nemese týystarynyń kepilgerligi arqyly qamaýdan bosatyldy. Bul faktiler boiynsha tergeý bastaldy. Ol jaittardyń quqyqtyq baǵasy sot-meditsinalyq saraptamalar men meditsinalyq qorytyndylarǵa bailanysty bolady. Sondai-aq, kýágerler men zardap shegýshilerdiń bergen jaýabyna da bailanysty», - dedi Elvira Ázimova.
Onyń aitýynsha, ustalǵandardyń densaýlyq jaǵdaiyna bailanysty qamaý sharalaryn balama sharalarmen aýystyrý týraly ótinishteridiń kóbi qanaǵattandyrylǵan.
«Emdelýdi qajet etetin basqa ustalǵandarǵa mekemeniń ishinde meditsinalyq qyzmet kórsetilip jatyr. Azamattyq meditsina ókilderinen quralǵan turaqty komissiialar atalǵan mekemelerge udaiy baryp júr», - dedi Adam quqyqtary jónindegi ýákil.
