Sýret: facebook / Anatoliy Ivanov-Weisskopf
Almaty qalasy Politsiia departamentiniń basshysynyń burynǵy orynbasary Berik Ádilbekov men taǵy da birqatar politsiia qyzmetkerleri 2022 jylǵy Qańtar oqiǵasy kezinde azaptaý isi boiynsha sottaldy, dep habarlaidy Kursiv.kz.
Sot úkimimen Berik Ábilbekov, Serik Turpanbaev, Baýyrjan Sopaqov, Nursultan Hamitov, Arman Shoibekov, Oljas Aidarhanov úsh jylǵa bas bostandyǵynan aiyryldy. Politsiia qyzmetkerleri sot zalynda qamaýǵa alyndy.
Prokýror azaptaýǵa aiyptylarǵa úsh jyl bas bostandyǵynan aiyrý jazasyn suraǵan bolatyn. Dese de, jábirlenýshi tarap úsh jyldyń tym az ekenin aitqan.
Aita ketetin jait, Qańtar oqiǵasy kezinde ustalǵan azamattardy azaptaý boiynsha sot protsesi ótken qyrkúiek aiynda bastalǵan bolatyn. Sottalýshylarǵa «laýazymyn asyra paidalaný» jáne «azaptaý» babymen aiyp taǵylǵan-dy.
Bul qylmystyq is boiynsha, qańtarda azaptalǵan 44 azamat jábirlenýshi bolyp tanylǵan. Onyń biri – qyrǵyzstandyq mýzykant Vikram Rýzahýnov. Budan bólek, 23 Ózbekstan azamaty bar.
Sot zalynyń aldyna isti bolǵan áriptesterin qoldaýǵa 50-ge jýyq politsiia kelgen. Olar áriptesterin kináli dep eseptemeidi. Joǵarydan túsken buiryqty oryndaǵanyn alǵa tartyp otyr.
Munyń aldynda Almaty garnizonynyń áskeri sotynda Qańtar oqiǵasynda oqqa ushqan arheolog Erlan Jaǵyparovtyń isi boiynsha sot otyrysy jabyq rejimde ótkenin jazǵan edik.
