Foto: BAQ.KZ
Qańtar oqiǵasynyń bastaý alǵanyna on kúnnen keiin, iaǵni 2 qańtarda 5 jyl tolady. Qandy qyrǵyn bolǵannan keiin elde birqatar ózgerister boldy. Eks-prezident Nursultan Nazarbaev Qaýipsizdik keńesi tóraǵasy qyzmetinen ketip, Úkimet taratyldy. Al jańa Úkimet basyna aldymen ýaqytsha, sosyn turaqty Álihan Smaiylov keldi. Qazirgi tańda QR Joǵary aýditorlyq palatasynyń Tóraǵasy bolyp otyrǵan Álihan Smaiylovqa Ult.kz tilshisi: «Qańtar oqiǵasy boiynsha Úkimet tarapynan jiberilgen qatelikter boldy dep moiyndaisyz ba? Eger ýaqytty keri qaitarý múmkin bolsa, sol kezdegi Úkimet sheshimderinde neni basqasha ister edińiz?» ‒ degen suraq qoidy.Álihan Smaiylov Qańtar oqiǵasynan keiingi jaǵdai qiyn bolǵanyn, áýeli eldiń áleýmettik-ekonomikalyq máselelerin sheshýge basa nazar aýdarǵanyn jetkizdi.
«Óte qaiǵyly jaǵdai boldy. Jańadan taǵaiyndalǵan Úkimettiń aldynda áleýmettik-ekonomikalyq jaǵdaidy turaqtandyrý máselesi eń bastapqy másele boldy. Esterińizde bar shyǵar, turǵynúi sharýashylyǵyn, kólik salasyn, bankter jáne saýda-sattyq salasyn qaita qalpyna keltirý jáne olardyń turaqty jumys isteýin qamtamasyz etý jumystary bastapqy ailary eń aldyńǵy qatardaǵy másele boldy. Sizder bilesizder, bizdiń kórshi memleketterde de geosaiasi shielenis bastaldy. Sanktsiialar, qosymsha sanktsiialar, táýekelder óte joǵary boldy. Sondyqtan sol táýekelderdiń aldyn alý úshin úlken jumys isteldi.
Sonymen birge kóp jyldan beri bizdiń infroqurylym jańǵyrtylmaǵan, sonyń saldarynan kei bir apattyq jaǵdailar oryn aldy. Sol apattyq jaǵdailardy sheshý úshin kóp ýaqyt ta, kúsh te, qarajat ta ketti. Sonymen qatar jaz ailarynda sý tapshylyǵy máselesi boldy. Infliatsiia óte joǵary boldy. Infliatsiianyń negizgi sebepteriniń biri, ol ‒ Resei rýbliniń AQSh dollarǵyna shaqqandaǵy quny 90 rýldan 55-60 rýlge deiin kúsheiýi edi. Sonyń saldarynan reseilik taýarlardyń barlyǵy bir mezgilde 30 paiyzǵa qymbattady. Onyń barlyǵy bizge keri áserin tigizdi. Sondyqtan Úkimet Ulttyq bankpen birlese otyryp, baǵalardy turaqtandyrý máselesin alǵa qoidy. Ózderińiz bilesizder, 2022 jyly infliatsiia 21 paiyz bolsa, kelesi jyly ony eki eseden astam mólsherge tómendetip, 9 paiyzdan sál-aq asty. Sondai-sondai kóptegen máseleler boldy», ‒ dedi Smaiylov.
Sonymen qatar «Investitsiia tartýdan rekorttyq deńgeige jettik» dep maqtanyshyn bildirgen burynǵy Úkimet basshysy 2022 jyly Qazaqstanǵa kelgen investitsiia kólemi 28 mlrd. dollardy quraǵanyn aitty. Al negizi kapitalǵa salynǵan investitsiialar kólemi 2022 jyly 9 paiyzǵa, 2023 jyly 10 paiyzǵa ósken.
«Zańnamaǵa kóptegen ózgerister engizip, myńnan astam biznestke kereksiz talaptardy joidyq. Sol oń áserin berdi dep oilaimyz. Biz ai saiyn Úkimet qaramaǵyndaǵy otandyq kásipkerlerdiń keńesin ótkizip, olardyń problemalaryn talqylap, júieli túrde sheshýge tyrystyq» ‒ dei kele Smaiylov jalpy turaqty ekonomikalyq damýdy qamtamasyz etip, halyqtyń ál-aýqatyn jaqsartýǵa tiisti jumystar isteldi dep oilaidy.
Sodan keiin:
«Birdeńeni qate jasadyq dep aita almaimyn», ‒ dep sózin qorytyndylady qazirgi Joǵary aýditorlyq palatanyń Tóraǵasy.
Aita keteiik, Álihan Smaiylov 2022 jyldyń 11 qańtary men 2024 jyldyń 1 sáýiri aralyǵynda QR Premer-ministri laýazymynda bolǵan.
2022 jyldyń 5 qańtaryna deiin Qazaqstan Respýblikasynyń Premer-ministri Asqar Mámin boldy.
