Qańtarda elde bolǵan jappai tártipsizdikterge qatysty Bas prokýratýraǵa 1728 fail kelip tústi. Bul týraly QR Bas prokýratýrasy arnaiy prokýrorlar qyzmetiniń basshysy Rizabek Ojarov málim etti, dep habarlaidy QazAqparat.
«Qańtar oqiǵasyna deiin táýelsiz Qazaqstan tarihynda bundai aýqymdy oqiǵa bolǵan emes. Myńdaǵan adamnan qańtar oqiǵasyna kýá nemese qatysýshy retinde jaýap alyndy. Qylmystyq protsesýaldyq kodekste kórsetilgen merzimge sáikes biz 2 aidyń ishinde istiń aq-qarasyn anyqtap úlgere almaimyz. Aita keteiik, urlyq-qarlyq sekildi qylmystyń ózi ailap tergeledi. Al bul jerde adam ólimi bar. Qylmystyq protseste basty mańyzdy nárse – aqiqat», - dedi Rizabek Ojarov «Qazaqstan» ulttyq telearnasynyń «Ashyq alań» qoǵamdyq-saiasi tok-shoýynyń efirinde.
Onyń aitýynsha, kez kelgen qylmystyq isti ashyq ári obektivti turǵyda tergeý kerek.
«Sondai-aq, biz qatysýshylardy tergep qana qoimai, olardyń quqyǵyn qorǵaýymyz kerek. Sondyqtan qańtar oqiǵasyna qatysty tergeý biraz júredi. Qoǵam oǵan daiyn bolýy kerek. 2 aidyń ishinde «bizde mynadai dálel bar, oqiǵa osylai boldy, mynaý - qatysýshylar, al mynalar - uiymdastyrýshylar» dep qazir aita almaimyz. Tergeý protsesine qatysty eshqandai kedergi joq. Jumysty jedeldetý úshin stopterrorism saity jumys istep tur. Búginge deiin azamattardan 1728 fail kelip tústi. Video-fotolar áli de kelip jatyr. Osy tusta aityp ótetin taǵy bir jait - jappai tártipsizdik kezinde buzaqylar 824 beinebaqylaý kamerasyn qiratqan», - deidi ol.
