Qazaqstanda qańtardaǵy tártipsizdikke qatysqany úshin ustalǵan 6 azamat ýaqytsha ustaý izoliatorynda qaitys boldy. Bul týraly Bas prokýratýranyń arnaiy prokýrorlar qyzmetiniń bastyǵy Rizabek Ojarov "Kazahstanskaia pravda" basylymyna bergen suhbatynda aitty, dep habarlaidy Sputnik Qazaqstan.
"Jaqynda ǵana tergeý barysynda ruqsat etilmegen ádisterdi qoldaný faktileri boiynsha qylmystyq isterdi qabyldadyq. Buǵan deiin olardy tergeýmen sybailas jemqorlyqqa qarsy qyzmet organdary ainalysqan. Bizge mundai isterdiń barlyǵy berilmedi, tek aýyr zardap kelgen, naqty aitsaq, ustalǵandardyń ólimi tirkelgen jaǵdailar berildi", - dep málimdedi Rizabek Ojarov.
Onyń aitýynsha, 2 adam – Almatyda, 3 adam Shyǵys Qazaqstan oblysynda jáne bir adam Taldyqorǵanda kóz jumdy.
"Sondai-aq biz Taldyqorǵannyń taǵy bir turǵynyna útik qoldanýǵa bailanysty azaptaý týraly rezonanstyq isti aldyq, ol áli kúnge deiin tergeý izoliatorynda otyr", - dedi arnaiy prokýrorlar qyzmetiniń bastyǵy.
Ol atalǵan faktiler boiynsha tergeý jalǵasyp jatqanyn, olardyń nátijesi habarlanatynyn aitty, alaida mundai qylmystar jappai sipatqa ie emes.
Sondai-aq Rizabek Ojaev tártipsizdik qatysýshylaryna qatysty aqparatty bólisti. Onyń sózinshe, tártipsizdikke qatysqandardyń basym bóligi 20-dan 30 jasqa deiingi jastar.
Onyń keibiri áleýmettik jáne saiasi talappen shyqsa, endi biri jaǵdaidy paidalanyp, tonaý jáne buzaqylyq áreketin iske asyrǵan.
Kúdiktilerdiń arasynda 8 shetel azamaty bar: beseýi Almatyda, ekeýi Shyǵys Qazaqstan oblysynda, taǵy biri Jambyl oblysynda ustaldy.
"Olar bizge kórshi memleketterdiń azamattary, Qazaqstandaǵy túrli uiymda túrli jumys isteidi", - dedi Rizabek Ojarov.
