Qazaqstan Prezidenti Qasym-Jomart Toqaev qańtar oqiǵasy kezinde elden ketýge usynys jasalǵanyn málimdedi, dep habarlaidy Sputnik Qazaqstan agenttigi.
"Rossiia 24" arnasyna suhbat bergen Toqaev qańtar oqiǵalarynyń negizgi maqsatyn da aitty.
"Barlyq tóńkeristiń negizgi maqsaty bir ǵoi, ol – basqa adamdardyń bilikke kelýi. Al maǵan keletin bolsaq, ol kúnderi osynda – Prezident rezidentsiiasynda boldym, eshqaida shyqqan joqpyn. Álbette, osy jerde túnep júrdim", - dedi Memleket basshysy.
Prezident jappai tártipsizdikter bastalǵanda eshqaida ketpeitinin málimdegen. Osyny taǵy bir márte eske saldy.
"Maǵan keibir "joldastar" tikushaqqa nemese ushaqqa otyryp, Qazaqstannan ketýge usynys jasaǵan. Men, árine, ondaidy josparlaǵan joqpyn. Osy jerde aiaǵyna deiin qalýǵa mindetti ekenimdi bildim ", - dep atap kórsetti Toqaev.
Memleket basshysynyń suhbaty búgin reseilik telearnanyń efirinde kórsetiledi.
Aita keteri, biyl qańtardyń basynda Jańaózen men Aqtaý qalalarynda suiytylǵan gazdyń baǵasy kúrt kóterilip ketti. Halyq kóshege shyqty. Artynan narazylyq aktsiialary respýblika boiynsha taralyp ketti. Birneshe qalada jappai tártipsizdikter bastaldy. Ásirese, Almaty qalasy qiyn jaǵdaiǵa tap boldy.
Qalada memlekettik mekemeler órttendi, dúkender tonaldy. Adam shyǵyny da az bolǵan joq. Respýblika boiynsha tótenshe jaǵdai engizildi. Bas prokýratýranyń málimetine sáikes, jappai tártipsizdikter kezinde 230 adam qaitys boldy. Olardyń arasynda 19 politsei men áskeri qyzmetshi bar.
