Qańtar oqiǵasy kezinde bilikti basyp alý maqsaty boldy. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaidy QazAqparat.
«Aktsiialardyń túpki maqsaty bilikti zorlyq-zombylyq arqyly basyp alý boldy. Zań boiynsha mundai is-qimyldar terrorizm aktisi retinde baǵalanady. Kóshede zorlyq-zombylyqty toqtatý men azamattardyń ómirin qorǵaý úshin quqyq qorǵaý jáne arnaiy organdardyń qyzmetkerleri qarý paidalanýǵa májbúr boldy», - dedi Berik Asylov.
Onyń aitýynsha, bul qadamdar quqyq qorǵaý qyzmeti týraly zańnamada qarastyrylǵan.
Budan buryn habarlanǵandai, Bas prokýror qańtar oqiǵasy kezinde 11 aimaqta agressivti toptar zorlyq-zombylyq satysyna ótkenin aitty.
«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktivti kúshterdiń arandatýyna boi bermeýge shaqyrdy. Alaida, birneshe márte sabyr saqtaýǵa shaqyrýǵa qaramastan, qylmystyq jáne radikaldy elementter belsendi de qatań áreketterge kóshti. 4-shi jáne 5-shi qańtarda azamattar jiyny agressivti topqa ainalyp, 11 aimaqta zorlyq-zombylyq satysyna ótti», - dedi B. Asylov.
