Qańtar oqiǵa boiynsha kámeletke tolmaǵan 9 kúdiktige qatysty qylmystyq is tergelip bitti. Bul týraly Ishki ister ministri Marat Ahmetjanov Májilistiń jalpy otyrysynda aitty, dep habarlaidy QazAqparat.
Májilis depýtaty Erlan Smaiylov Ishki ister ministrligine qańtar oqiǵasy boiynsha qýdalaý orbitasyna alynǵan kámeletke tolmaǵan kúdiktilerdiń taǵdyry týraly suraq qoidy.
«Búginde Ishki ister organdarynyń óndirisinde kámeletke tolmaǵan tulǵalarǵa qatysty ister boiynsha 12 kúdikti bar. Olardyń báriniń bultartpaý sharalary bas bostandyǵyn shekteýmen bailanysty emes. Onyń ishinde sizderdiń ótinishterińiz boiynsha da bultartpaý sharalary ózgertildi.
Bizdiń memlekettiń qylmystyq saiasatynyń tujyrymdamasynda eki vektorly damý joly bar. Biz asa aýyr jáne aýyr qylmys jasaǵandarǵa qatysty bultartpaý sharalaryn qatańdatý boiynsha túzetýler engizgenbiz. Al bas bostandyǵynan aiyrmai túzep alýǵa bolatyndarǵa qatysty sharalardy kriminalsyzdandyrý, gýmanizatsiialaý sharalary qolǵa alyndy. Sondyqtan bizdiń memlekettiń tujyrymdamasy boiynsha bas bostandyǵynan aiyrý oryndarynda shynymen qoǵamǵa qaýip tónidretinder otyrýy kerek», - dedi Ishki ister ministri.
Onyń málimeti boiynsha, atalǵan 12 kúdiktiniń 3-ne qatysty qylmystyq is áli tergelip jatyr.
«Olardyń jeke basyn eskerip, kámeletke tolmaǵanyn eskerip, istegenderine ókinetinin, keltirilgen shyǵyndardy ótegenin eskerip, erkindigin shekteýmen bailanysy joq bultartpaý sharalary qabyldandy. 9 kúdikti boiynsha qylmystyq is tergelip bitti. Olar qazir sotta. Ol jerde obektivti baǵa beriledi. 3 kúdiktige qatysty is áli óndiriste. Búginde bizdiń óndirisimizde kámeleket tolmaǵandar qamaýda otyrǵan joq», - dedi Marat Ahmetjanov.
