Qańtar oqiǵasy boiynsha tergeý organdarynyń is júrgizýinde 5 041 qylmystyq is bar. Bul týraly Ortalyq kommýnikatsiialar qyzmetinde QR Bas prokýratýrasy 1-qyzmet basshysynyń orynbasary Eldos Qilymjanov aitty, dep habarlaidy QazAqparat.
«Bas prokýratýra qańtar oqiǵalaryna bailanysty qylmystyq isterdiń tergelý barysy týraly habarlaidy. Jappai tártipsizdikter men terrorizm aktileri Almaty, Shymkent qalalary, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda bolǵan. Árbir óńirde tergeý toptary tergeý áreketterin júrgizip, olardyń aiaqtalýyna qarai qylmystyq ister sotqa joldanýda. Qazirgi kezde tergeý organdarynyń is júrgizýinde atalǵan sanatta 5 041 qylmystyq is bar. Olardyń ishinde jappai tártipsizdikter boiynsha 49 is, terrorizm aktilerine qatysty – 45», - dedi E. Qilymjanov.
Onyń aitýynsha, Shymkent qalasynyń prokýratýrasy qiratýlar, múlikterdi joiý jáne avtokólikterdi órtegeni úshin, iaǵni jappai tártipsizdikterge qatysqany boiynsha 8 kúdiktiniń isin sotqa berdi.
«Atalǵan beinejazbada jappai tártipsizdikter beinelengen. Qyzylorda oblysynda osy tektes aiyppen 7 adamǵa qatysty ister kináni moiyndaý týraly protsestik kelisim jasaý arqyly sotqa jiberildi. Mundai isterdiń sotta qaralý erekshelikteri jóninde habarlap ketsem. Kúdikti aiyptaýǵa, dáleldemelerge, keltirilgen zalalmen daýlaspaǵan kezde jáne jazanyń túri men mólsherimen kelisken jaǵdaida onymen kináni moiyndaý týraly kelisim jasalady. Sotta 10 táýlikten aspaityn merzimde qaralady jáne jazanyń mólsheri osy baptyń sanktsiiasyndaǵy eń joǵary merzimniń jartysynan aspaidy. Bul rásim boiynsha 3 adamǵa qatysty úkim qabyldanyp, olar boiynsha bas bostandyǵynan aiyrýǵa bailanysty emes jazalar taǵaiyndaldy», - dedi Bas prokýratýra ókili.
