Qańtardaǵy oqiǵa barysynda 11 aimaqta agressiv toptar zorlyq-zombylyq satysyna ótti. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaidy QazAqparat.
«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktivti kúshterdiń arandatýyna boi bermeýge shaqyrdy. Alaida, birneshe márte sabyr saqtaýǵa shaqyrýǵa qaramastan, qylmystyq jáne radikaldy elementter belsendi de qatań áreketterge kóshti. 4-shi jáne 5-shi qańtarda azamattar jiyny agressiv topqa ainalyp, bul 11 aimaqta zorlyq-zombylyq satysyna ótti», - dedi Asylov «qańtar oqiǵasy» týralia baiandamasynda.
Onyń aitýynsha, uiymdastyrýshylar aiqyn josparmen áreket etken. «Vatsap» jáne «Telegramm» arqyly toptyń jinalýy men qozǵalysyn úilestirgen.
«Olar kóp adamdy jinap alyp, armatýra, taiaq, tas, «Molotov kokteilimen» qarýlandy. Keiinnen toptyń bir bóligi dúkenderdi qiratyp, tonaýǵa kiristi. Tonaýdan keiin, qylmystyń izin jasyrý úshin, tipti kóppáterli úilerdiń birinshi qabatyndaǵy úi-jailardy órtegen.
Basqa qarýly toptar maqsatty túrde, ákimdikterdiń, Prezident rezidentsiiasynyń, politsiianyń, Ulttyq qaýipsizdik komitetiniń ǵimarattaryna shabýyl jasap, basyp aldy. Almatydaǵy áýejai men basqa da nysandardy qiratty. Olar qorshaýdy qalai buzý kerektigin bilip, politsiiaǵa shabýyl jasady, atys qarýyn alý úshin, ańshy dúkenderin tonady. Teleefirge shyǵýǵa tyrysty, ol iske aspai qalǵan kezde, telekompaniia keńselerin tonap, órtep jiberdi», - dedi Bas prokýror.
