Almatyda jappai tártipsizdik kezinde ydys-aiaq dúkenin tonaǵan er adam ustaldy, dep habarlaidy QazAqparat.
Almaty qalalyq Politsiia departamentiniń málimetinshe, kúdiktini ustaý kezinde as úi ydystary tárkilendi.
«Jappai tártipsizdikter kezinde tótenshe jaǵdaidy paidalana otyryp, A. esimdi azamat saýda ortalyqtarynyń birinde ornalasqan ydys-aiaq satatyn býtikten jalpy quny bes million teńge bolatyn as úi ydystaryn alyp ketken. 32 jastaǵy azamat qylmysyn moiyndady. Ol sondaǵy birneshe beinebaqylaý kamerasyna jáne kýágerlerdiń smartfonyna túsip qalǵan», – dedi Bostandyq aýdandyq politsiia basqarmasy janyndaǵy politsiia bóliminiń bastyǵy Ǵalym Qasymbaev.
Atalǵan derek boiynsha sotqa deiingi tergeý bastaldy. Kúdiktiniń áreketteri QR QK-niń 188-baby 3- bóliginiń 3-tarmaǵymen (Urlyq) saralanady.
«Kúdikti urlanǵan zattardy sata almaǵan. Jedel ýákilder urlanǵan as úi ydystaryn tárkilep, aiǵaq retinde qylmystyq is materialdaryna tirkedi. Almaty qalasynyń mamandandyrylǵan aýdanaralyq tergeý soty «qamaýǵa alý» túrindegi bultartpaý sharasyn sanktsiialady», - dedi Ǵalym Qasymbaev.
