Qańtar oqiǵalarynda oq tigen 2 bala ólip, 7-eýi jaraqat aldy. Bul týraly QR DSM Meditsinalyq jáne farmatsevtikalyq baqylaý komitetiniń tóraǵasy Baýyrjan Baiserkin aitty, dep habarlaidy QazAqparat.
«Tótenshe jaǵdai kezeńinde meditsinalyq uiymdarǵa 2 740 zardap shekken adam kómek alýǵa júgindi. Olardyń ishinde 1 843 adam ambýlatorlyq kómek alyp, 897 adam aýrýhanaǵa jatqyzyldy. Onyń ishinde 188 adam reanimatsiialyq bólimshede boldy. Búginde 891 patsient jazylyp shyqty», - dedi Baýyrjan Baiserkin Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, 177 adam meditsinalyq uiymdarda ómirden ozdy.
«Qazirgi ýaqytta 6 adam, Almaty men Qyzylordada 3 adamnan statsionarlarda em alyp jatyr. Olardyń biriniń jaǵdaiy aýyr, oq tigen. Em alýda. Elimizdiń úsh óńirinde kámeletke tolmaǵan balalar zardap shekti. Almatyda 2 bala oq tiip qaza tapty. 7 bala túrli oq jaraqatymen aýrýhana tústi. Olardyń 4-eýi – Almatyda, ekeýi – Almaty oblysynda jáne bireýi – Jambyl oblysynda. Sonymen qatar Almaty oblysynda bir júkti áiel shashylǵan gazdan zardap shekti», - dedi Baýyrjan Baiserkin.
