almaty.tv telearnasy
Almatyǵa jumysqa kelgen Ózbekstan azamaty qańtar oqiǵalarynan keiin habar-osharsyz ketken. Týystary onyń tártipsizdikterge qatyspaǵanyna senimdi, - dep habarlaidy Tengrinews.kz agenttigi Almaty.tv arnasyna silteme jasap.
Telearna málimetinshe, 4 ai boiy Qaraqalpaqstan (Ózbekstan quramyndaǵy avtonomiialyq respýblika) turǵyndary habar-osharsyz ketken týysy Azat Jumaniiazovty izdestirip jatyr. Olardyń aitýynsha, Azat Qazaqstanǵa jumysqa ketken, biraq qańtar oqiǵalarynan keiin týystary onymen bailanysa almaǵan. Sońǵy ret 44 jastaǵy er adamdy Almatydaǵy "Altyn Orda" bazarynyń mańynda kórgen.
"Úiden shyǵyp, qaita oralmady", - deidi inisi Nurlan Óteniiazov.
Onyń aitýynsha, týysy Almatydaǵy qurylysta jumys istegen. Qańtar oqiǵalarynan keiin bailanys úzilgen. Sodan beri otbasy ony izdep jatyr.
"Azattyń jary kún saiyn jylaidy. Qońyraý shalyp, izdeý nátijelerin suraidy. Onyń 5 jasar qyzy da únemi "ákem qaida?" deidi. Meniń oiymsha, ol alańǵa shyqpady. Sebebi 5 qańtarda onyń telefony Dolan aýylynyń mańynda óship qalǵan. Al miting Almatyda ótti. Ol bara alar ma edi? Menińshe, joq", - dedi aǵasy.
Azattyń týystary ol aman dep úmittenedi. Óitkeni er adamnyń denesi birde-bir máiithanadan tabylmaǵan. Izdeýge eriktiler tartylǵan. Biraq izdeý sátsiz aiaqtalǵan. Keiin joǵalǵan adamnyń týystary politsiiaǵa júgingen.
"Bul derek Alataý aýdandyq Politsiia basqarmasynda tirkeldi. Izdestirý bastaldy, arnaiy tergeý-jedel toby quryldy. Ol habar-osharsyz ketken adamdy izdestirýge jáne onyń ornalasqan jerin anyqtaýǵa baǵyttalǵan", - dedi Politsiia departamentiniń resmi ókili Saltanat Ázirbek.
Qazir Azat Jumaniiazovtyń otbasy bárinen ony izdeýge kómek kórsetýin suraidy. 102 nómirine qońyraý shalýǵa bolady.
