Qazaqstanda qańtarda bolǵan jappai ereýil kezinde qylmys jasady degen kúdikpen 1 myńnan astam adam jaýapqa tartylyp jatyr. Bul týraly QR IIM tergeý departamentiniń basqarma basshysy Ermek Shúlden málim etti, dep habarlaidy QazAqparat.
«Qazir qańtar oqiǵasyna qatysty ár is jan-jaqty qaralyp jatyr. Jappai tártipsizdiktiń sebebi men saldary anyqtalýda. Búginde 2919 qylmystyq is qozǵalǵan. Onyń deni - urlyq pen tonaý. Jappai tártipsizdikti paidalanyp qarapaiym halyqtyń múlkin talan-tarajǵa salyp, tonaǵan. Sonymen qatar zańsyz qarý-jaraq ielený de bar. Qazirgi tańda osy qylmystyq ister boiynsha 1 myńnan astam adam jaýapkershilikke tartylyp jatyr. Onyń 400-i kúzetpen ustaldy, onyń ishinde 219 adamǵa bas bultartpaý sharasyn qoldandyq», - dedi Ermek Shúlden «Qazaqstan» ulttyq telearnasynyń «Ashyq alań» qoǵamdyq-saiasi tok-shoýynyń efirinde.
IIM ókiliniń aitýynsha, ustalǵan kúdiktilerdiń ishinde jasóspirimder de bar.
«Qańtar oqiǵasy kólemdi, qaralatyn is kóp. Ár oqiǵany tiianaqty, obektivti túrde qaraý kerek. Jappai tártipsizdik kezinde 1700-den astam nysan zaqymdandy. Ishki ister organdary urlyq, kisi óltirý, tonaý jáne basqa qylmys túri boiynsha tergeý jalǵasyp jatyr», - deidi ol.
