© Sputnik / Vladislav Vodnev
Qańtar oqiǵalary kezinde 7 meditsina qyzmetkeri zardap shegip, 46 jedel járdem kóligi zaqymdandy. Bul týraly QR DSM Meditsinalyq jáne farmatsevtikalyq baqylaý komitetiniń tóraǵasy Baýyrjan Baiserkin aitty, dep habarlaidy QazAqparat.
«Jalpy, atalǵan kezeń ishinde 20 densaýlyq saqtaý nysanyna shaýyl jasaldy. Onyń ishinde Almaty qalasynda 5 statsionar, MSAK-tyń 1 nysany, 14 dárihana bar. Osy aralyqta 7 meditsina qyzmetkeri, onyń ishinde 5-eýi Almatyda, bireýi Shymkentte jáne taǵy bireýi Almaty oblysynda zardap shekti», - dedi komitet tóraǵasy Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, 46 jedel járdem kóligi zaqymdandy. Zańymdanǵan kólikterdiń basym bóligi Almaty qalasynda – 32. Sonymen qatar 4 kólik jaramsyz bolyp qaldy.
«Tótenshe jaǵdai kezinde qannyń jetkilikti kólemin qamtamasyz etý úshin elordadan Almaty qalasyndaǵy respýblikalyq qan ortalyǵyna shamamen 360 doza qan jetkizildi. Bul ahýal ýshyqqan jaǵdaida qoldanýǵa arnalǵan qor jasaý úshin jasaldy. Sonymen qatar Ishki ister ministrligimen «SQ Farmatsiia» kompaniiasynyń Almaty, Shymkent, Nur-Sultan, Aqtóbe qalalaryndaǵy iri qoimalarda turǵan dári-dármekti táýlik boiy qorǵaý boiynsha jedel is-shara qabyldandy. Ol jerde tegin meditsinalyq kómektiń kepildendirilgen kólemine kiretin barlyq dári-dármek saqtalady. Sonymen qatar narkotikalyq jáne psihotropty dárilik zattar da bar», - dedi komitet tóraǵasy.
Baýyrjan Baiserkinniń atap ótýinshe, atalǵan kezeńde qaýyrt jeli uiymdastyryldy. Olarǵa 4 myńnan astam qońyraý tústi.
