Nevada shtatyndaǵy Sporttyq komissiianyń (NSAC) direktory Bob Bennet meksikalyq Saýl Alvares Golovkindi 118-110 esebimen jeńdi degen sýdia Adelaida Berdpen birge jekpe-jekti qaita qarap, odan árbir raýndta bergen baǵasyn túsindirip berýin talap etýge ýáde berdi, - dep jazady kaz.vesti.kz.
"Biz Adelaidamen birge jekpe-jekti kóremiz, árbir raýndty. Ol maǵan ne kórgenin, qalai kórgenin jáne ár boksshyǵa nelikten sondai baǵa bergenin túsindirip beretin bolady. Árine, qatelespegen boks tóreshileri joq. Ol bul joly qatelik jiberdi, biz qajetti sharalardy qoldanamyz", - dedi Bob Bennet.
"Biz úlken máselemen ainalysyp jatyrmyz jáne oǵan úlken jaýapkershilikpen qaraimyz. Men sheneýnikterge jekpe-jekterge naqty bir adamdy qoiýǵa keńes berýdiń aldynda biraz jumys isteimin. Ókinishke qarai, men Berdtiń jibergen qateligine jaýap beremin", - dedi NSAC direktory.
Allboxing.ru málimetinshe, Berd osyǵan deiin de túrli jekpe-jekterde shettetilgen. Mysaly, 2016 jyldyń qarashasynda Lomachenko - Ýolters kezdesýiniń uiymdastyrýshylary ony tóreshilerdiń quramynan alyp tastaýdy suraǵan eken.
"Biz osy jekpe-jekke Adelaida Berdti qoimaýlaryn suraǵan bolatynbyz", - dedi Top Rank kompaniiasynyń vitse-prezidenti Boxingscene.com basylymyna bergen suhbatynda. - Tóreshilerde jaqsy da, jaman da keshter ótedi. Keide olar shyndyqqa múlde jaqyn emes sheshim shyǵaryp jatady. Alaida Bob ony barynsha qorǵap, bizdiń qarsylyǵymyzdy tyńdaǵysy kelgen joq".
Eske sala keteiik, tóreshi Adelaida Berd Golovkin men Alvares jekpe-jeginde jeńisti meksikalyqqa (118-110 esebimen) bergen bolatyn. Ekinshi tóreshi Deiv Moretti jeńisti, kerisinshe, qazaqstandyq boksshyǵa berdi (115-113), al úshinshi tóreshi Golovkin men Alvares (114-114) teń tústi dep aitty.
Al keiinirek Sporttyq komissiia basshysynyń "Kanelonyń" paidasyna daýys bergen tóreshini shettetkeni jaily habarlanǵan bolatyn.
Eske sala keteiik, 17 qyrkúiekte Las-Vegasta ótken jekpe-jek 12 raýndqa sozyldy. Jekpe-jek qorytyndysy boiynsha Golovkin men Alvares teń túsip, Golovkin barlyq titýlyn saqtap qaldy.
