Meksikalyq boksshy, tórt salmaq dárejesi boiynsha álem chempiony Saýl Alvares qazaqstandyq Gennadii Golovkinmen jekpe-jekke qatysty pikir bildirdi, - dep habarlaidy Massaget.kz agenttigi vRINGe.com basylymyna silteme jasap.
"Bizde eki jekpe-jek boldy, al jankúierler úshinshisin qalaidy dep oilaimyn. Men revanshtan keiin bári aiaqtalatynyna senimdi boldym. Maǵan bul jetkilikti boldy. Biraq jankúierler óz suraqtaryna tolyq jaýap ala almady. Olar bizdiń qaisymyz myqty ekenimizdi naqty bilýi kerek", - dedi Kanelo Matchroom Boxing YouTube arnasyna bergen suhbatynda.
Kanelo óz talaptaryn bylai dep túsindirdi: "Ol árqashan meniń onsha myqty emes ekenimdi, Meksikany uiatqa qaldyryp júrgenimdi aitty. Taǵysyn taǵy. Dál osy sebepti men oǵan ashýlanamyn. Biraq bárinen buryn men oǵan ashýlanǵan sebebimdi aitaiyn, ol munyń bárin meniń kózime aita almaidy. Biz bir-birimizge qarama-qarsy turǵanda, ol qandai da bir sebeptermen úndemeidi. Buǵan men ashýlanamyn. Biraq men oǵan sportshy retinde qurmet kórsetemin. Ol - jaqsy, óte qiyn qarsylas, myqty jáne aqyldy, boks tarihyndaǵy eń uly boksshylardyń biri".
"Men qazir shyńdala tústim, kúshti, tájiribeli bola tústim dep sanaimyn. Men qazir formanyń shyńyna shyqtym dep oilaimyn. Bul sheshýshi ról atqarady dep oilaimyn. Jankúierlerdiń pikiri me? Jurt aita beredi. Eger ol jeńse, olar baqytty bolady. Eger men jeńsem, men týraly "bar bolǵany 40 jastaǵy adamdy jeńdi" dep oilaidy. Olar ne aitatyny mańyzdy emes. Men úshin taǵy bir nárse mańyzdy - meniń kezdesýge daiyndyǵym, ringtegi áreketterim", - dedi meksikalyq.
Alvares úshinshi jekpe-jekten keiin qol alysý týraly suraqqa da jaýap berdi. "Bul meniń eń úlken jeńisterimniń biri bolady. Ár raýndta qiyn bolady, biraq toǵyzynshy, onynshy nemese 11-raýndta men jekpe-jekti merziminen buryn jeńispen aiaqtaimyn. Jekpe-jekten keiin qol alysý bola ma? Bilmeimin... Biz ekinshi jekpe-jekte bir-birimizge qol tigizdik. Bári jaqsy bolyp kórindi, sodan keiin ol jekpe-jekten keiin men týraly birdeńe aita bastady. Men árqashan qarsylastar týraly jaqsy jáne qurmetpen aitamyn. Men qarsylastardy urysqa deiin jáne odan keiin qurmetteimin. Jekpe-jekten keiin qol alysý bola ma, joq pa - bilmeimin..." - dedi ol.
18 qyrkúiekke qaraǵan túni Las-Vegasta boks keshi ótedi, onyń basty jekpe-jeginde Gennadii Golovkin men Saýl Alvares kezdesedi. Meksikalyq ekinshi orta salmaqtaǵy IBF, WBC, WBA Super jáne WBO nusqalary boiynsha absoliýt chempion ataǵyn qorǵaý úshin jekpe-jekke shyǵady. Bul - GGG men Kanelonyń trilogiiasy, olardyń birinshi jekpe-jegi teń nátijemen aiaqtaldy, al ekinshisi - tóreshilerdiń basym bóliginiń sheshimimen meksikalyqtyń paidasyna sheshildi.
