Kandidattar debaty. Poroshenko men Zelenskii ne aitty? (Video)

Petr Poroshenko men Vladimir Zelenskii. Kiev, 19 sáýir 2019 jyl.

19 sáýirde Kievtegi "Olimpiiskii" stadionynda prezidenttikke kandidat Petr Poroshenko men Vladimir Zelenskiidiń debaty ótti.

Debatty bastaǵan Zelenskii «2014 jylǵy sailaýda Petr Poroshenkoǵa daýys bergenin, biraq onysy qate bolǵanyn» aitty. Ol «qazirgi Poroshenko men burynǵy Poroshenkonyń aiyrmasy kóp, eki Poroshenko bar jáne men sizdiń qatelikterińizdiń nátijesimin» dedi.

Al ekinshi bolyp sóz alǵan Petr Poroshenko «bul debatqa ázer jettik, óitkeni Zelenskii myrza bizden, halyqtan jasyrynyp keldi» dedi.

Ol Zelenskiidiń el basqara alatynyna kúmáni bar ekenin bildirdi. Poroshenko «bul kandidat álsiz, Pýtinniń soqqylaryn kótere almaidy» dep ashyq aitty.

Ýkrainanyń qazirgi prezidenti Petr Poroshenko «2014 jyly Ýkrainany prezident retinde qabyldap alǵan kezde elde altyn rezervi bos bolǵan, el qazynasynda aqsha joq, ásker de joq edi» dedi. Ol Zelenskiidi «elde soǵys bolyp jatqanda sen Reseidiń aqshasyna kino túsirip, Ýkrainany mazaqqa ainaldyryp júrgensiń» dep aiyptady.

Debatqa kelgen jurt. 19 sáýir 2019 jyl.

Al Zelenskii Poroshenkodan «DNR men LNR aimaǵynda (Ýkrainanyń shyǵysyn basyp alǵan reseilik separatisterdiń moiyndalmaǵan respýblikasy – red.) «Roshen» (Petr Poroshenkoǵa tiesili konditerlik kompaniia – red.) konfetteri satylyp jatqany ras pa?» dep surady. Ýkraina prezidenti muny «jalǵan» dedi.

Poroshenko Zelenskiiden «seriktesińiz (milliarder Igor Kolomoiskii – red.) «Privatbanktegi» qarjyny urlap ketkeni úshin onyń qolyn kesesiz be?» dep surady. Zelenskii bul saýalǵa «aiypty bolsa jaýap beredi, bári túrmege otyrady» dedi.

Debat kezinde Zelenskii Poroshenkonyń «Ýkrainany bes jyldan soń qalai elestetesiz?» degen suraǵyna «Ýkraina Eýropaǵa bet aldy, sol úshin qanyn tókti. Eger halyq meni garant dep qoldasa, oǵan daiynmyn. Men prezidenttik qyzmette tek bes jylǵa ǵana otyram. Qaita sailanbaimyn» dep jaýap berdi.

Budan soń sóz alǵan Poroshenko «Piatyi kanaldy» (Poroshenkoǵa tiesili telearna - red) ádildikti aitatyn, jýrnalisterge qolaily oryn dep sipattady. Ol «1+1 arnasyn» (milliarder Kolomoiskiidiń jekemenshik telearnasy - red) «jalǵan aqparat taratýmen ainalysady» dep aityptady.

Debattyń biraz bóligi Petr Poroshenko men Vladimir Zelenskiidiń emes, Poroshenko men Kolomoiskii arasynda ótkendei áser qaldyrdy. Prezident sóziniń kóp bóligin milliarderdi aiyptaýǵa arnady.

Igor Kolomoiskii men shoýmen Vladimir Zelenskiidiń qarym-qatynasy týraly aqparat quraldary jii jazady.

Poroshenko «siz Sheshenstan prezidenti Ramzan Qadyrovty mazaqtap, artynan keshirim surap edińiz. Al Ýkraina halqynan jezókshege teńep, únemi mazaqtaisyz, sol úshin qashan keshirim suraisyz ba?» dedi. Zelenskii «Qadyrovpen eshqashan kezdespegem» dedi de, «soǵysta balasyn joǵaltqan anadan, ákesin joǵaltqan baladan, búkil Ýkraina halqynan keshirim suraýǵa qashan da ázirmin» dep, tizerlep otyrdy.

Zelenskii «siz 98 jyldan beri sheneýniksiz. Biraq keiin oligarh bolyp kettińiz» dep, Poroshenkonyń kásibine kúmánmen qaraitynyn aitty. 

Zelenskii «Petr Poroshenkonyń jetistigi az emes – til, ásker, Eýropa odaǵymen vizasyz rejim. Biraq bul jetistikterdi ol ózine menshiktep alǵysy keledi. Meniń oiymsha, ýkrain tili sizge deiin myqty bolǵan, al Eýropamen vizasyz rejim – sizge deiingi diplomattardyń da eńbegi. Ásker – Ýkraina halqynyń, eriktileriniń erligi. Bul júieni ózgerte alatynymyzǵa senem. Al siz bizdiń bes jylymyzdy urladyńyz» dedi.

Poroshenko «Siz talantty aktersiz, jaqsy prodiýserlik kompaniia qurdyńyz, jaqsy tele ónim jasadyńyz. Biraq siz – elden qashyp ketken jalǵyz oligarhtyń (Kolomoiskii aitady– red.) adamysyz. Kolomoiskii, nege halyqtan aqshańyzdy jasyrasyz, nege tyǵylasyz? Zelenskiidiń jaqtastary, sizder 21 sáýir kúni memleketti Pýtin men Kolomoiskiidiń talaýyna bermeýlerińizdi suraimyn» dedi.

Debat erejesi boiynsha ár kandidat 5 minýt kirispe sóz sóiledi jáne 36 minýt suraq-jaýap kezeńin ótkizdi. Odan keiin qorytyndy sózge 5 minýt berildi.

«Olimpiiskii» stadionynda eki sahna qurylǵan jáne kandidattardyń qoldaýshylary da sol eki sahnanyń mańyna toptasty. Debat bastalarǵa birer minýt qalǵanda Petr Poroshenko Vladimir Zelenskiidiń sahnasyna bardy. Eki úmitker bir-birine jyly shyrai tanytyp, qol alysty.

• Sailaýdyń ekinshi kezeńine ótken soń Zelenskii Poroshenkony debatqa shaqyrǵan. Poroshenko birden kelisim bergen. Debat 14 sáýirge belgilengen. Kievtegi «Olimpiiskii» stadiony debat ótetin jer retinde tańdalǵan.

• 14 sáýirde Poroshenko debatqa kelgen. Biraq Zelenskii «debatty óz maqsatyna paidalanǵysy keletin kúshter bar» dep stadionǵa kelmedi. Poroshenko stadionǵa kelgen jaqtastarynyń aldynda sóz sóilep, jýrnalisterge suhbat bergen. Keiin eki kandidattyń komandasy debatty 19 sáýirde ótkizýge ýaǵdalasqan.

• 31 naýryzda Ýkrainadaǵy sailaýda Zelenskii 30 paiyz, Porshenko 15 paiyz daýys jinap, ekinshi týrǵa ótken. Kiev halyqaralyq institýtynyń saýalnamasynyń nátijesi boiynsha, ekinshi kezeńde sailaýshylardyń 72 paiyzy Zelenskiige daýys berýge daiyn.

• Sailaýdyń ekinshi kezeńi 21 sáýirde ótedi.

Nurbek Túsiphan, Azattyq