Jer reformasy jónindegi komissiianyń birinshi otyrysynda «Qazaq ádebieti» gazetiniń bas redaktory Dáýren Qýat qandastarǵa jer nege jalǵa berilmeitinin, satylmaitynyn túsindirdi, dep habarlaidy QazAqparat.
«Qandastarǵa jerdiń jalǵa berilmeýi, satylmaýy týraly ministr myrza túsinikteme bere ketýi kerek edi. Bul - ashyna aitatyndai áńgime emes. Sebebi, qandas degenimiz – ýaqytsha statýs. Bir jyldyń ishinde shetelden kelgen etnikalyq qazaqtarǵa, ózimizdiń baýyrlarymyzǵa azamattyq beremiz, bir jyldan keiin azamattyq alǵan qandastar Qazaqstan azamatyna tiesili barlyq múmkindikterge ie bolady. Muny men ádeii qadap aitqym keledi, nege deseńiz, osy jer komissiiasynyń otyrysynan keiin «Qandastarǵa jer berilmeidi eken, qandastardy keýdesinen iterip otyr» degen sóz shyǵyp, áleýmettik jelide túrli pikirler bolýy yqtimal. Sondyqtan, máseleniń basyn ashyp alǵan durys dep oilaimyn», - dedi ol jer reformasy jónindegi komissiianyń birinshi otyrysynda.
Bul rette spiker etnikalyq qazaqtarǵa azamattyq berý joldaryn jeńildetý kerektigin aitty.
«Ekinshi másele, jer máselesimen kópten shuǵyldanyp júrgen azamattar jinalysta otyr. Dei turǵanmen, biz aýyl sharýashylyǵy mamandarynyń máselelerine tereńdep bara almaimyz. Jerdi paidalanýdyń barlyq tetikterin sheshý úshin fermerlermen, aýyl sharýashylyǵy salasynda jumys istep júrgen adamdarmen ymyraǵa kelýimiz kerek dep oilaimyn. Olardy kóbirek tyńdaýymyz kerek. Aldaǵy otyrystarymyzda onlain bailanystar jasaý kerek shyǵar. Biraq ol ákimdik tarapynan bolmaýy kerek. Ákimdik adamdarynyń bireýdi daiyndap, osylai sóile, bizde bári jaqsy dep aitqany kerek emes. Bizge kúndelikti máseleni kórip júrgen fermerlerdiń, diqandardyń nemese malshylardyń sóilegeni kerek, olar máseleni sheshý joldaryn usyna alady», - deidi bas redaktor.
Úshinshi másele retinde spiker jalǵa beriletin aýyl sharýashylyǵy jerlerindegi tarihi eskertkishterdi erekshe qorǵaýǵa alýdy usyndy.
«Mysaly, Qapal-Arasanda Baianjúrek jazbalary bar, Tańbaly tas bar, Mańǵystaýda sandyqtastar jatyr, Altaida, Arqada qanshama eskertkishke toly jerler bar. Osy eskertkishter jalǵa alatyn jerge kiretin bolsa, jalǵa alýshylar oǵan tarihi eskertkish, qoryq dep qaramaidy, mal sharýashylyǵynyń yńǵaiyna paidalana beredi. Sondyqtan memleket bolashaqta jalǵa beriletin jerler ishinde tarihi eskertkishter men erekshe máni bar jerler bolsa, qorǵaýǵa alýy kerek», - dedi Dáýren Qýat.
