Májilistiń Zańnama jáne sot-quqyqtyq reforma komitetiniń tóraǵasy Qanat Mýsin jergilikti qaýymdastyqtarǵa ákimder sailaýyna úmitkerdi usyný múmkindigin berýdi usyndy, dep habarlaidy QazAqparat.
«Búgin aitqan usynystaryńyz zań jobasyn talqylaýǵa depýtattyq túzetýler arqyly ense, qaraýǵa daiynbyz. Eshqandai erekshe jaǵdai bolmaidy. Ákim sailaýyna úmitkerlerdiń biliktilik talaptaryna, sailanyp alyp, keiin partiiadan shyqqan ákimderdiń taǵdyry týraly máseleler kóp aityldy. Ákim bolýǵa úmitkerlerdi usyný sýbektisi týraly da aitýymyz kerek dep oilaimyn», - dedi Qanat Mýsin.
Ol zań jobasynda kandidat usynýdyń tek úsh sýbektisin qarastyrylyp otyrǵanyn eske saldy.
«Zań jobasynda saiasi partiianyń usynýy, ózin-ózi usyný jáne osy eki nusqa da múmkin bolmasa, aýdan ákimi usyný degen sýbektiler ǵana qarastyrylǵan. Biraq men ákim bolýǵa úmitkerdi jergilikti qaýymdastyqtyń da usyna alýy kerek degen máseleni qaraýdy usynar edim. Menińshe bul da mańyzdy másele. Bolashaq ákim ózin-ózin usyný bir basqa da, jergilikti halyq usynsa múlde basqa másele. Jergilikti qaýymdastyq ta óz kandidatyn usyna alýy kerek», - dep túiindedi komitet tóraǵasy.
Sondai-aq, Qanat Mýsin jańa ózgertýler boiynsha aýdan ákimderi de jergilikti ákimder sailaýyna kandidat usyna alatynyn aitty.
Buǵan deiin habarlaǵanymyzdai, Ulttyq ekonomika ministrligi ázirlegen zań jobasynda saiasi partiialardyń Májilis sailaýyna tirkeýden ótý shegin 5 paiyzǵa túsirý kózdelgen.
