Kanadada úndis balalaryna arnalǵan burynǵy mektep-internattyń aýmaǵynda 751 balanyń súieginiń tabylýyna bailanysty, taǵzym etý aktsiiasy ótti, dep habarlaidy "Ult aqparat" Anadoly agenttigine silteme jasap.
Balalardyń qańqasy 24 maýsym kúni Kanadanyń batysyndaǵy Saskachevan provintsiiasynda ornalasqan burynǵy mektep-internattyń aýmaǵynda tabylǵan.
Kaýsess okrýginiń jergilikti halqynyń qaýymdastyǵymen uiymdastyrylǵan aktsiia duǵa oqýdan bastaldy. Keiin qaza bolǵan balalardyń rýhyna bir minýt únsizdik jariialandy.
Koronavirýs pandemiiasyna bailanysty duǵa oqý sharasyna 150 adam qatysty. Olar balalardyń qurmetine 751 balaýyz maishamyn jaqty.
Kaýsess okrýginiń jergilikti halqy qaýymdastyǵynyń ókili Djonatan Lerattyń sózinshe, provintsiiada alǵash ret balalardyń qańqasy 10 jyl buryn tabylǵan. Sondai-aq ol qańqalar mektep-internattan 10 metr qashyqtyqta tabylǵanyn aitty.
Kanada koroldiginiń atty politsiiasynyń málimetinshe, balalardyń súiekteri tabylǵannan keiin kóp uzamai Britan Kolýmbiiasy provintsiiasynyń Similkamin aýdanynda ornalasqan katolikterdiń kóne eki shirkeýi tolyǵymen janyp ketken. Olarǵa ot qasaqana qoiyldy degen boljam bar. Shirkeýler Kamplýpstaǵy mektep-internattan 200 metr qashyqtyqta ornalasqan. Osy Kamplýpsta órt oqiǵasyna deiin 215 balanyń súiegi tabylǵan.
«Politsiia órt oqiǵalaryn kúmándi dep sanaidy. Sebebi ot qoiý úshin tez janatyn suiyqtyq paidalanylǵan jáne órt eki shirkeýde bir mezgilde tutanǵan», - delingen sait aqparatynda.
