Óz densaýlyǵymyzdy, jaqyndarymyzdyń densaýlyǵyn oilasaq, qamsyz, qareketsiz otyrmaýǵa tiispiz. QR Parlamenti Senatynyń depýtaty Nurtóre Júsip osyndai pikir bildirdi, dep habarlaidy QazAqparat.
«Memleket basshysy Qasym-Jomart Toqaev óz úndeýinde 13 shilde - Ulttyq aza tutý kúni dep jariialaǵan bolatyn. Búgin túnde Qazaqstannyń barlyq qalasynda memlekettik týlar túsirildi. Nur-Sultan ýaqytymen 12:00-de elde bir minýttyq únsizdik jariialandy. Qaterli dertten qaitys bolǵan azamattardyń rýhyna taǵzym jasaldy. Elimizde koronavirýs juqtyrǵandardyń sany 59 myńnan asyp, onyń ishinde 375 adam qaitys bolǵany anyqtaldy. Qazaqta «Óli razy bolmai, tiri baiymaidy» degen sóz bar. Qaiǵydan qan jutyp, qara jamylǵan áýletterge qaiǵysyna ortaqtasyp kóńil aitamyn», - dedi Nurtóre Júsip.
Senator munyń aldynda Memleket basshysy Qasym-Jomart Toqaev Úkimettiń keńeitilgen jiynyn ótkizgenin, Úkimettiń jumysyn jáne salalyq vedomstvolardyń jumysyn qatań synǵa alǵanyn basa aitty.
«Jaǵdaidyń óte kúrdeli sipat alǵany belgili. Prezident eldiń kókeiinde júrgen sózderdi ashyq aitty. Durys. Jaǵdaidy ashyq aitý kerek. Shyndyqty jasyrmaý qajet. Bul turǵydan alǵanda Prezident osynyń aldynda jasaǵan televiziialyq Úndeýinde jáne búgingi jiynda eshteńeni jasyryp, jaba toqyp, máseleden syrt ainalyp ketken joq. «Qalyptasqan ahýal eki aptadan keiin jaqsarady dep úmittenemin. Olai bolmaǵan jaǵdaida, jalpy Úkimettiń osy quramda jumys isteý múmkindigi týraly másele týyndaidy», - dep Úkimet múshelerine qatań eskertý jasady», - dedi ol.
Osy oraida Nurtóre Júsip tórt-bes máseleni ortaǵa saldy.
«Birinshi, eldi qajetti dári-dármekpen qamtamasyz etý. «Dárihanalarda dári-dármek tolyp tur» degen aqparat bar. Ol nege elge jetpeidi? Ár oblys halqyna qajet dári-dármekti dereý jetkizýdiń ne qiyndyǵy bar? Dári-dármek tapshylyǵyn qoldan týǵyzyp otyrǵandar bolsa, dereý anyqtap, jazalaý qajet. Ekinshi, jekelegen azamattar óz qarjysyna dem aldyratyn apparat aldyrtyp jatyr. Osy jabdyqtardy kedendik rásimdeý, jedel qajetti aimaqtarǵa jetkizý isinde úilesimdi áreket joq. Qazir ár minýt qymbat. Shabandyq jibergen saiyn adam shyǵyny kóbeie bermek. Úshinshi, Prezident «Biz jumystyń tásilderin únemi ózgerte beremiz. Burynǵy basshylyq aiaq astynan naýqastardy simptomdy jáne simptomsyz dep bólý kerek dep sheshti. Qazir bul ádistemeden bas tarttyq. Mine osyndai áreketter halyq arasynda kúmán týǵyzady», - dedi. Jumys tásilderin ózgerte berýden opa tappaimyz. Bardy bar, joqty joq dep aitýdyń qanshalyq qiyndyǵy bar ekenin túsinbeimin. Osy rette qashyqtan jumys isteýge jiberilgen, shaǵyn jáne orta biznesi toqtap qalǵan, kúnkóris jaǵdaiy qiyndaǵan azamattardy esepke alyp, memleket tarapynan tiisti qoldaý sharalaryn jasaý qajet dep bilemin», - dedi senator.
Ol tórtinshiden balalardyń bilim alý máselesine toqtaldy.
«Oqý qandai jaǵdaida júredi? Ministrlik usynyp otyrǵan úsh nusqanyń eń tiimdisi qaisy? Osy máselede de anyq aqparat qajet. Ata-analar balalaryn mektepke daiyndaý isinde memleket tarapynan naqty jaýaptar kútedi. Oqýlyqpen qamtý isi de nazarda bolýy tiis. Besinshi, jaz ilezde ótedi. Kúz keledi. Qys keledi. Qysqa daiyndyqty qazirden bastaý qajet. Jaz mezgilinde pisken jemis-jidekten tosap qainatý, dárilik shópterdi jinaý, quramynda dárýmen mol azyq-túlik qoryn jasaý da kezek kúttirmeitin sharýalar. Ashyǵyn aitý kerek, halyq túrli qiyndyqpen betpe-bet qaldy. Ár azamat, ár otbasy, ár áýlet amandyqtyń qamyn jasamasa bolmaidy. Óz densaýlyǵymyzdy, jaqyndarymyzdyń densaýlyǵyn oilasaq, qamsyz, qareketsiz otyrmaýǵa tiispiz. Qaterli indetten qutylýdyń barlyq sharasyn jasaý qajet. Onsyz at tóbelindei halqymyzdyń basy qaterge tigiledi. Elimiz aman, jurtymyz tynysh bolǵai!», - dedi Nurtóre Júsip.
