Kámeletke tolmaǵandarǵa qatysty jynystyq qylmystardyń jazasy kúsheitildi. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy "Ult aqparat".
«Memleket basshysy Qazaqstan halqyna Joldaýynda kámeletke tolmaǵandarǵa qatysty jynystyq qylmystar úshin jazany qatańdatýdy tapsyrǵan bolatyn. Keibir zańnamalyq aktilerge tiisti ózgerister ázirlenip, Parlamenttiń qaraýyna engizildi. Biylǵy 11 qańtardan bastap, bul ózgerister zańdy kúshine endi. Osylaisha, balalarǵa qarsy jasalatyn jynystyq sipattaǵy qylmystyń kez kelgen túrine jaýapkershilik qatańdatyldy», - dedi resmi ókil ministrlikte ótken onlain brifingte.
Kámeletke tolmaǵandarǵa qatysty jynystyq qylmys jasaǵany úshin sanktsiialar kúsheitildi.
«Máselen, Qylmystyq kodekstiń 120-baby «Zorlaý» qylmysy boiynsha aitar bolsaq, tómengi shegi 15 jyldan 17 jylǵa deiin bas bostandyǵynan aiyrýǵa ózgertildi. Ata-anasynyń, ógei ákesiniń, pedagogtiń osyndai qylmysqa barǵany úshin sanktsiia 17 jyldan 20 jylǵa deiin ulǵaityldy. Buryn bul norma boiynsha 12-17 jyl bekitilgen edi», - deidi N. Oraz.
Osyndai ózgerister Qylmystyq kodekstiń 121, 122, 123, 124, 134,144, 312-baptaryna da engizildi.
«Bul bastama kámeletke tolmaǵandarǵa qatysty jasalatyn zorlyq-zombylyq áreketteri men qylmystardy aýyzdyqtaidy degen úmit bar», - deidi Nurdildá Oraz.
Aita keteiik, jyl basynan beri 6484 qylmys jasaldy, onyń 4321-i táýlik ishinde ashyldy.
