كەمەلەتكە تولماعاندارعا قاتىستى جىنىستىق قىلمىستاردىڭ جازاسى كٷشەيتٸلدٸ. بۇل تۋرالى قر ٸشكٸ ٸستەر مينيسترلٸگٸنٸڭ رەسمي ٶكٸلٸ نۇردٸلدە وراز مەلٸم ەتتٸ, دەپ حابارلايدى "ۇلت اقپارات".
«مەملەكەت باسشىسى قازاقستان حالقىنا جولداۋىندا كەمەلەتكە تولماعاندارعا قاتىستى جىنىستىق قىلمىستار ٷشٸن جازانى قاتاڭداتۋدى تاپسىرعان بولاتىن. كەيبٸر زاڭنامالىق اكتٸلەرگە تيٸستٸ ٶزگەرٸستەر ەزٸرلەنٸپ, پارلامەنتتٸڭ قاراۋىنا ەنگٸزٸلدٸ. بيىلعى 11 قاڭتاردان باستاپ, بۇل ٶزگەرٸستەر زاڭدى كٷشٸنە ەندٸ. وسىلايشا, بالالارعا قارسى جاسالاتىن جىنىستىق سيپاتتاعى قىلمىستىڭ كەز كەلگەن تٷرٸنە جاۋاپكەرشٸلٸك قاتاڭداتىلدى», - دەدٸ رەسمي ٶكٸل مينيسترلٸكتە ٶتكەن ونلاين بريفينگتە.
كەمەلەتكە تولماعاندارعا قاتىستى جىنىستىق قىلمىس جاساعانى ٷشٸن سانكتسييالار كٷشەيتٸلدٸ.
«مەسەلەن, قىلمىستىق كودەكستٸڭ 120-بابى «زورلاۋ» قىلمىسى بويىنشا ايتار بولساق, تٶمەنگٸ شەگٸ 15 جىلدان 17 جىلعا دەيٸن باس بوستاندىعىنان ايىرۋعا ٶزگەرتٸلدٸ. اتا-اناسىنىڭ, ٶگەي ەكەسٸنٸڭ, پەداگوگتٸڭ وسىنداي قىلمىسقا بارعانى ٷشٸن سانكتسييا 17 جىلدان 20 جىلعا دەيٸن ۇلعايتىلدى. بۇرىن بۇل نورما بويىنشا 12-17 جىل بەكٸتٸلگەن ەدٸ», - دەيدٸ ن. وراز.
وسىنداي ٶزگەرٸستەر قىلمىستىق كودەكستٸڭ 121, 122, 123, 124, 134,144, 312-باپتارىنا دا ەنگٸزٸلدٸ.
«بۇل باستاما كەمەلەتكە تولماعاندارعا قاتىستى جاسالاتىن زورلىق-زومبىلىق ەرەكەتتەرٸ مەن قىلمىستاردى اۋىزدىقتايدى دەگەن ٷمٸت بار», - دەيدٸ نۇردٸلدە وراز.
ايتا كەتەيٸك, جىل باسىنان بەرٸ 6484 قىلمىس جاسالدى, ونىڭ 4321-ٸ تەۋلٸك ٸشٸندە اشىلدى.
