Foto ashyq derekkózden alyndy
Almaty oblysynda kámelet jasyna tolmaǵan qyzdy aldap, basqa aýylǵa alyp ketken azamatqa qatysty sot úkimi shyqty, dep habarlaidy "Ult aqparat" oblystyq sottyń baspasóz qyzmetine silteme jasap.
Almaty oblysy Jambyl aýdandyq soty QR Qylmystyq kodeksiniń 125-baby 2-bóliginiń 5-tarmaǵy ("kórineý kámeletke tolmaǵan adamdy urlaý") boiynsha quqyqbuzýshylyq áreketterin jasady dep aiyptalǵan A.-ǵa qatysty qylmystyq isti qarady.
Osy jyldyń 6 maýsymynda saǵat 06:00 shamasynda masań kúide bolǵan azamat A. Qarǵaly aýylyna qarai kólik toqtatyp turǵan kámeletke tolmaǵan qyz balany kórip, aldap sózge tartyp, ózimen birge Uzynaǵash aýylyna alyp ketken. Ol jolda birneshe qonaq úige toqtamaq bolǵan, alaida qonaq úi ákimshileri sottalýshynyń masań kúide bolǵanyn kórip qabyldaýdan bas tartqan. Sodan er adam qyz balany ózimen birge ertip, Qarasai aýdanynda ornalasqan úidiń syrtyndaǵy «Monsha» atty jazýdy kórip, sol úide uiyqtap alý múmkindigi bar dep oilap, aýlasyna alyp kirgen. Sol ýaqytta aýlaǵa shyqqan úidiń iesin kórgen qyz bala A.-nyń qolynan sytylyp shyǵyp, atalǵan azamattyń ózin aldap urlap ketkeni týraly aitqan. Úi iesi jaǵdaidy birden uialy telefonynyń videokamerasyna túsire bastaǵan. Bul áreketterdi kórgen A. óziniń qylmystyq áreketterin aiaqtap, oqiǵa ornynan boi tasalaǵan.
Sot baspasóz qyzmetiniń málimetinshe, prokýror QR QK-niń 125-baby 2-bóliginiń 5-tarmaǵymen azamat A.-ny kináli dep tanýdy jáne 10 jyl bas bostandyǵynan aiyrý jazasyn taǵaiyndaýdy, sondai-aq jazasyn qylmystyq-atqarý júiesiniń qaýipsizdigi ortasha mekemesinde óteýdi belgileýdi suraǵan.
Óz kezeginde, sottalýshy A. kinásin moiyndap, kámeletke tolmaǵan A.-ǵa qatysty teris oiy bolmaǵanyn aityp, bas bostandyǵynan aiyrmaýdy suraǵan. Al jábirlenýshiniń zańdy ókili, anasy sottalýshyny keshirmeitinin aityp, qatań jaza taǵaiyndaýdy suraǵan.
"Sottalýshynyń kinási qylmystyq is materialdarymen, kýágerlermen, jábirlenýshiniń jaýaptarymen jáne basqa da obektivti dáleldemelermen dáleldenip, rastaldy.
Sottalýshyǵa jaza taǵaiyndaý barysynda, sot onyń qylmystyq jaýaptylyǵy men jazasyn jeńildetetin mán-jailar retinde istegen áreketine shyn júrekten ókingendigin, al qylmystyq jaýaptylyǵy men jazasyn aýyrlatatyn mán-jailar retinde onyń qylmysty alkogoldik mas kúiinde jasaǵanyn tanydy.
QR QK-niń 125-baby 2-bóligi 5-tarmaǵynyń sanktsiiasynda múlki tárkilenip, jeti jyldan on eki jylǵa deiingi merzimge bas bostandyǵynan aiyrý jazasy kózdelgen.
Sottalýshy A. atalǵan bap boiynsha kináli dep tanylyp, 10 jylǵa bas bostandyǵynan aiyrý jazasyna kesildi. Jazany qylmystyq-atqarý júiesiniń qaýipsizdigi ortasha mekemesinde óteidi" - delingen habarlamada.
