Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov koronavirýs infektsiiasynan qalai emdelgenin aitty, dep habarlaidy "Ult aqparat".
«Indet aýyr dárejede ótti. Jalpy, klassikalyq stsenarii boiynsha ótti dep aitýǵa bolady. Ókpem qabyndy. Elordadaǵy statsionarlardyń birinde emdeldim», - dedi K. Nadyrov Ortalyq kommýnikatsiialar qyzmetindegi onlain baspasóz qyzmetinde.
Onyń sózine qaraǵanda, em-domdy bekitilgen diagnostika jáne emdeýdiń klinikalyq hattamasyna sai jasaǵan.
«Bul statsionarda 15 kún boldym. Osy oraida óziniń mindetin adal atqaryp júrgen áriptesterime shyn júrekten alǵysymdy aitqym keledi. Olar táýlik boiy statsionarlarda qyzmet etýde», - dedi basqarma basshysy.
Sonymen qatar, ol infektsiiadan emdelip jatqan naýqastardy mamandardyń barlyq nusqaýlaryn oryndaýǵa shaqyrdy.
Eske sala keteiik, 22 sáýirde Densaýlyq saqtaý vitse-ministri qyzmetinen bosatylǵan Kamaljan Nadyrovtan koronavirýs anyqtalǵan bolatyn.
