Bir jylǵa jetpeitin ýaqyt ishinde Ózbekstan men Qazaqstannyń ekonomikalyq qarym-qatynasy 35 paiyzǵa ósken. Bul óte joǵary kórsetkish, - deidi eki eldiń tyǵyz qarym-qatynasy jaily aitqan saiasattanýshy Kamal Burhanov. Bul týraly baq.kz saity jazdy.
«Ózbekstan men Qazaqstan Orta Aziiadaǵy eń úlken irgeles eki memleket qana emes, týysqan ult retinde qatar damyp keledi. Eki eldiń ekonomikasy básekeles emes, birin-biri tolyqtyrady dep esepteimin», - degen saiasattanýshy Jibek jolynyń boiyndaǵy eki eldiń bolashaqtaǵy qarym-qatynasy tipti de nyǵaia túsetinine senimdi.
Kamal Nizamuly eki el investitsiiasyna Ózbekstandaǵy 1 jarym mln qazaq pen elimizde ómir súretin 400 myń ózbek aǵaiynnyń úlesi bar ekenin aitty.
«Elbasynyń burynǵy Prezident Islam Kárimovpen qarym-qatynasy óte jaqsy boldy. Basqany aitpaǵanda, Elbasymyz bir jylǵa jetpeitin ýaqyt ishinde qazirgi Prezident Shavkat Mirziioevpen 5 ret kezdesken. Sol kezdesýlerde qanshama qujattarǵa qol qoiyldy. Osy az ýaqyt ishinde eki el arasyndaǵy ekonomikalyq qarym-qatynas 35 paiyzǵa ulǵaiypty. Endi eki memleket saýda-sattyq qatynasyn 5 mlrd AQSh dollaryna jetkizýdi kózdep otyr. Ózbekstanda 1 jarym mln qandasymyz tursa, bizdiń elde 400 myń ózbek aǵaiyn ómir súrip otyr. Olardyń barys-kelisiniń ózi qanshama investitsiiany elge tartyp jatyr. Biz úshin orta ǵasyrda Jibek joly arqyly qalyptasqan saýda qarym-qatynasyn damytýǵa úlken múmkindikter bar», - dedi Kamal Burhanov.
