Pavlodar qalasynda tekserýshiler toidyń ústinen tústi. Qonaqtarmen birge qalyńdyq pen kúieýjigit te qashyp bara jatqan video tarady, dep habarlaidy Sputnik Qazaqstan.
Resmi málimetke sáikes, ótken demalys kúnderi Pavlodarda bas sanitarlyq dáriger qaýlysyn buzýdyń 11 faktisi anyqtaldy. Adamdar shekteý sharalaryna qaramastan, toi-domalaq ótkizgen.
"6 tamyz kúni keshki saǵat 20.00-de Haidarov kóshesindegi toihanada monitoringtik top úilený toiyn ótkizý faktisin anyqtady. Ol jerde 30-ǵa jýyq qonaq boldy. Al tekserýshilerdi kórgen qalyńdyq pen kúieýjigit aiyppuldan qorqyp, qonaqtarmen birge qasha jóneldi", - deidi politseiler.
Monitoringtik top túsirgen videoda qalyńdyqtyń aq kóilegin kóterip alyp, qashyp bara jatqany kórinedi. Alaida qara kostiým kigen jigit ekeýi alysqa uzai almady. Olar basqa adamdarmen birge politsiia bólimine jetkizgen.
"Atalǵan fakt boiynsha barlyq materialdar jinalyp, Ákimshilik quqyq buzýshylyq kodeksiniń 425-baby boiynsha ákimshilik jaýapkershilikke tartý úshin sanitarlyq-epidemiologiialyq baqylaý basqarmasyna joldandy. Osy bapqa sáikes úilený toiynyń árbir qonaǵyna 30 AEK (87 510 teńge) mólsherinde, sondai–aq, mekeme iesine 230 AEK (670 910 teńge) kóleminde aiyppul tóleýge týra keledi" – dep atap kórsetti politsiia qyzmetiniń bastyǵy Arman Kaptaev.
Aita keteri, jyl basynan beri Pavlodarda monitoringtik toptar sanitarlyq talap buzýdyń 146 faktisin anyqtady.
