Kanadanyń Kalgari qalasyna jaýǵan qalyń qar júzdegen jol-kólik oqiǵasyna sebep boldy, dep habarlaidy CBS.
Jergilikti politsiia qyzmetinen málim etkendei, senbi kúni tańǵy 6-dan jeksenbi kúni tańǵy 10-ǵa deiingi aralyqta 171 jol apaty tirkelgen. Olardyń saldarynan 13 adam zardap shekken.
«Kalgaride qar jaýǵan soń osyndai apattar jii bolady», - deidi politseiler.
Apattyń eń irisi Beddington Trail jáne Deerfoot Trail kúre joldarynyń qiylysynda bolǵan. Onda 16 kólik bir-birine soqtyǵysqan.
Environment Canada-nyń deregine súiensek, qaladaǵy jaýyn-shashynnyń jalpy mólsheri 15-25 santimetrge jetýi múmkin.
Okotoks, Hai River, Klersholm, Kraýnsnest Pass, Pincher Krik, Ýoterton, Kananaskis jáne Kenmor aýdandarynyń turǵyndaryna aýa raiyna bailanysty eskertýler jiberilgen.
Alberta provintsiiasynyń ońtústik-batys bóligin de qar basqan. Dúisenbi kúni munda qardyń qalyńdyǵy 1 metrge deiin jetýi yqtimal.
Atalǵan aýdandarǵa barmaqshy bolǵan turǵyndarǵa saparlaryn keiinge qaldyrýǵa keńes berilýde.
Kalgari halyqaralyq áýejaiy jeksenbi kúngi reisterdiń denin toqtatty. Dúisenbide Kalgaridiń ońtústiginde ornalasqan mektepterde, Letbridj ýniversitetinde, Kainai Board of Education mektebinde sabaq bolmaityny jariialandy.
