Belgili aqyn, «Daryn» syilyǵynyń laýreaty Qalqaman Sarin áleýmettik jelide pikir qaldyryp, halyqty birlikke shaqyrdy. Ol eldegi ózgeristerdi saralai kele, Prezident Qasym-Jomart Toqaevtyń inaýgýratsiiada jariialaǵan ustanymynyń mańyzdylyǵyn alǵa tartady.
«Osy áleýmettik jelide búgingi bilikti synaýshylardyń da, jaqtaýshylardyń da pikirin oqyp otyramyn. «Seniki de durys, seniki de jón» dep qoia salýǵa bolatyn edi. Biraq, men de óz elimdi, ultymdy, tilimdi sheksiz súietin adammyn. Jalpy men saiasatqa aralasa bermeitinderdiń qatarynanmyn. Aqyn-jazýshy halyqtyń rýhani tárbieshisi dep, tek qana shyǵarmashylyqpen júrgen adammyn. Biraq, el birligi men tynyshtyǵyna qatysty máselede saiasatker nemese tarihshy bolý mindetti emes dep oilaimyn. Sol sebepti, sailaýdan keiin, asyqpai otyryp óz oiymdy bildirýdi jón kórdim», - dep jazady Qalqaman Sarin.
Bul rette ol áleýmettik jelide aitylyp jatqan áńgimelerge qatysty óz pikirin de bildirip, azamattardy synǵa abai bolýǵa shaqyrady. «Synnyń aitylǵany durys. Al eger synnyń ózi syn kótermei tursa she? Bireýdi synardan buryn ózimiz ne istedik, tym bolmasa óz turmysymyzdy, týysymyzdyń jaǵdaiyn, aǵaiynnyń, aýyldastyń tirshiligin túzetý úshin ne istedik? - dep suraq qoisaq bolar edi, ózimizge» deidi ol.
Sondai-aq, Qalqaman Sarin jaqynda ótken sailaýǵa qatysty da óz oiyn bildirgen. «Táýelsiz Qazaqstannyń tarihynda ekinshi Prezidentti sailap otyrmyz. Sailaýǵa deiingi qyzmetin qosyp eseptegende Qasym-Jomart Toqaevtyń Memleket basshysy qyzmetine kiriskenine áli 100 kún de tolmapty. Iaǵni, áli tipti, qolǵa alǵan jumystarynyń alǵashqy nátijeleri de shyǵyp úlgergen joq», - dei kele Prezidentti ulyqtaý rásimindegi Qasym-Jomart Toqaevtyń sózderin de keltiredi.
Ol Memleket basshysynyń qoǵamda qordalanǵan kez kelgen máseleni talqylaýǵa ashyq ustanym bildirgenin atap ótip, usynystardy qaraýǵa, birlesip sheshim qabyldaýǵa daiyndyǵyn da aita ketedi.
«Prezidenttiń qyzmetine kirise salyp alǵashqy qol qoiǵan Jarlyqtarynyń biri - Ulttyq qoǵamdyq senim keńesin qurý. Qasym-Jomart Toqaev osy qadamdarymen óziniń BAQ úshin de, jalpy qoǵam úshin de dialog qurýǵa ashyq ekenin bildirip otyr dep oilaimyn. Osy qadamdar ashyqtyqqa dálel emes pe? Aita ketetin taǵy bir másele, eger ulyqtaý rásimindegi Prezidenttiń sózin muqiiat tyńdasańyzdar, ol búgingi qoǵamda qalyptasqan áleýmettik-ekonomikalyq jáne basqa da problemalardy, qiynshylyqtardy ashyq aityp berdi. Iaǵni, «jaýyrdy jaba toqyp» otyrǵan joq. Problemalardyń bar ekenin, tipti, halyq turmysynyń nasharlaǵanyna deiin ashyq aityp otyr. Basqa qai eldiń basshysy resmi qyzmetke kiriskende qoǵamnyń problemasyn ashyq kórsetip edi? Kóp jaǵdaida aldaǵy 5 jylda atqaratyn sharýaǵa ýáde berip, problemalardyń ústimen óte shyǵatyn. Qasym-Jomart Toqaev olai etpedi. Nege? Óitkeni, eldiń basyndaǵy taýqymetten, qordalanǵan kóp jylǵy problemalardan, aýyldyń tozyp, aǵaiynnyń azyp ketkeninen, kásiporyndardyń turalap tynysyn asha almai turǵanynan, el tizginin endi ǵana qolyna alyp otyrǵan Prezidenttiń habardar ekenin halyq bilsin dep otyr. Sóitip, endi osy tyǵyryqtan shyǵýdyń 10 baǵytyn aiqyndap, atqarýshy bilikke aldaǵy 5 jylda qan-sorpa jumys turǵanyn anyq ańǵartty. Sol siiaqty jemqorlyqpen kúres máselesi. Bilesizder, buǵan deiin memlekettik qyzmet pen jemqorlyqpen kúres mekemeleri bir shańyraqtyń astynda edi. Endi jemqorlyqpen ymyrasyz soǵystyń bastalǵanyn aiǵaqtaǵandai óz aldyna bólek organ quryldy. Kásibi mamandar shoǵyrlandyrylyp, tiisti zańnamalarmen bekitilip jatyr. Bul maidanda endi eshqandai aiaýshylyq, barmaq basty, kóz qysty tirliktiń bolmaitynyn kórsetpei me?! Budan artyq ne kerek?! Ketken prezident te unamaidy, kelgeni de jaman dep otyrsaq, syrttan bizge bireý jaqsysyn ákep bere me? 70 jyldan astam basqalar basqardy ǵoi, ol quqaidy da kórip edik qoi. Endi ózimizdi ózimiz baǵalaiyqshy, aǵaiyn! Jalpy, rasynda osy el úshin, ult úshin jany aýyryp júrgender bolsa, óz usynystaryńyzdy zańdy jolmen engizip, keteýi ketken dúnie bolsa birge túzetýge, qoǵamda, ózimiz júrgen ortada ádildikti birge ornatýǵa umtylaiyq ta, aǵaiyn! «Altaý ala bolsa, aýyzdaǵy ketedi, Tórteý túgel bolsa, tóbedegi keledi» degen. Birigýge shaqyramyn! Alash balasy, kók týdyń astyna birigeiik!» , - dep jazady Qalqaman Sarin.
