Kaliforniia shtaty Santa-Klarita qalasynda orta mektepte atys bolyp, eki bala mert boldy, dep habarlaidy CNN agenttigi.
Los-Andjelesten 40 mil qashyqtyqta ornalasqan mekteptegi atystan 14 jastaǵy jasóspirim men 16 jastaǵy boijetken qaza tapty. 14-15 jastaǵy úsh mektep oqýshysy túrli deńgeide jaraqat alyp, aýrýhanada jatyr.
Oq atqan osy mektepte oqityn Nataniel Berhov atty oqýshy bolyp shyqty. Kýágerlerdiń aitýynsha, sabaq bastalardyń aldynda Berhov sómkesinen tapansha alyp oqýshylarǵa, keiin óziniń basyna oq atqan.
Los-Andjeles okrýginiń politsiiasy oq atqan oqýshynyń aýrýhanada aýyr halde jatqanyn habarlady.
Ázirge onyń ne úshin oqýshylarǵa oq atqany belgisiz. Politsiianyń málimetinshe, Berhovtyń sol kúni týǵan kúni bolyp, 16 jasqa tolǵan.
Onyń anasy men súiiktisi qazir politsiia ýchaskesinde. Politsiia oqiǵanyń ne sebepti bolǵanyn anyqtaýǵa tyrysyp jatyr. Oq atýshy men onyń qurbandaryn bir nárse ǵana bailanystyrady – olar bir mektepte oqidy.
AQSh prezidenti Donald Tramp Santa-Klaritada mekteptegi atys saldarynan balalarynan aiyrylǵan otbasylarǵa kóńil aitty.
«Biz qaza tapqandardyń otbasylary men dostaryna qaiǵyryp, kóńil aitamyz jáne jaraqat alǵandardyń tezirek saýyǵyp ketýi úshin duǵa etemiz», - dep jazdy Donald Tramp Twitter-de.
