Qazaqstan qoǵamdyq damý ministri Darhan Káletaev jas mamandardyń shetelderge ketip jatqanyna qatty alańdamaýǵa shaqyrdy. Ministr bul sózin 18 aqpan kúni májilistegi Úkimet saǵatynda aitqan. Ol "mamandardyń ketýi - búkilálemdik tendentsiia" degen.
Káletaevtyń sózinshe, "elden ketip jatqandardyń 70 paiyzy - ózge etnos ókilderi".
Ministr "bul - qalypty jaǵdai, adamdar óziniń tildik ortasyn, shyǵý tegin izdep ketip jatyr. Budan tragizm sezinbeýimiz kerek" degen.
Biraq ministrdiń sózimen keibir depýtat kelispedi. Májilis spikeriniń orynbasary Gúlmira Isimbaeva "Qazaqstannyń ereksheligi - kópultty el, sondyqtan ony saqtaýymyz kerek" dese, depýtat Ahmet Mýradov ta áriptesiniń sózin qoldap, Qazaqstanda kópulttyń saqtalýy "strategiialyq resýrs" ekenin aitqan.
Resmi málimet boiynsha, 2012 jyldan bastap Qazaqstannan ketip jatqandar kúrt kóbeigen.
Statistika komitetiniń dereginshe, 2018 jyly elden ketkender 40 myń adamǵa jetip, aldyńǵy jylmen salystyrǵanda 11 paiyzǵa artqan. Olardyń kóbi Reseige kóshken.
Sonymen qatar, Darhan Amanuly bul jiynda aýyl jastarynyń jaǵdaiyn jaqsartý tetikterin túsindirdi.
«Ózderińiz kórip otyrsyzdar, Memleket basshysynyń Jastar forýmynda bergen tapsyrmalarynyń bári de asa mańyzdy jáne olar óz deńgeiinde oryndalatyn bolady. Osy tusta, myna jaitqa da toqtalǵym keledi. Bul - aýyl jastarynyń máselesi. Shyny kerek, osy jerde otyrǵan kóbimiz aýyldan shyqtyq. Aýyl - Qazaqstannyń altyn besigi, biz úshin sakraldy týǵan jer. Jastar jylynda biz aýyl jastary máselesin jan-jaqty sheshýdiń joldaryn qarastyryp jatyrmyz. Onyń ishinde, Elbasy aitqandai, «Diplommen - aýylǵa» baǵdarlamasy arqyly aýylǵa barǵan jastardyń alǵashqy járdemaqysy 100 ailyq eseptik kórsetkishke ósip otyr», - dedi ministr.
Onyń sózine qaraǵanda, vedomstvo aýylǵa baratyn jas mamandar úshin arnaiy kásiporyndarda kvotanyń sanyn ulǵaitý, bilim granttaryn kóbeitý máselesin qarastyryp jatyr.
«Aýyldyq jerdegi infraqurylymdy jańartý, jańa jumys oryndaryn, meditsinalyq-mádeni oshaqtardyń qurylysyn salý Aýmaqtyq damý josparlaryna naqty engizilýi qajet dep esepteimiz. Sondai-aq, «Serpin», «Jas maman», «Jas kásipker» baǵdarlamalarynyń maqsaty bir - aýyl jastarynyń ahýalyn jaqsartý. Árine, búgingidei ýrbanizatsiialyq, tsifrlyq, joǵary tehnologiialyq dáýirde eshkimdi aýylǵa bailap otyra almaisyń. Alaida, tym bolmaǵanda, aýyldyń áleýmettik-ekonomikalyq jaǵdaiy qalamen teńese bastaityn bolsa, aýyldyń oty eshqashan óshpeidi dep oilaimyn!», - dedi Darhan Káletaev.
.jpeg)