قازاقستان قوعامدىق دامۋ مينيسترٸ دارحان كەلەتاەۆ جاس مامانداردىڭ شەتەلدەرگە كەتٸپ جاتقانىنا قاتتى الاڭداماۋعا شاقىردى. مينيستر بۇل سٶزٸن 18 اقپان كٷنٸ مەجٸلٸستەگٸ ٷكٸمەت ساعاتىندا ايتقان. ول "مامانداردىڭ كەتۋٸ - بٷكٸلەلەمدٸك تەندەنتسييا" دەگەن.
كەلەتاەۆتىڭ سٶزٸنشە, "ەلدەن كەتٸپ جاتقانداردىڭ 70 پايىزى - ٶزگە ەتنوس ٶكٸلدەرٸ".
مينيستر "بۇل - قالىپتى جاعداي, ادامدار ٶزٸنٸڭ تٸلدٸك ورتاسىن, شىعۋ تەگٸن ٸزدەپ كەتٸپ جاتىر. بۇدان تراگيزم سەزٸنبەۋٸمٸز كەرەك" دەگەن.
بٸراق مينيستردٸڭ سٶزٸمەن كەيبٸر دەپۋتات كەلٸسپەدٸ. مەجٸلٸس سپيكەرٸنٸڭ ورىنباسارى گٷلميرا يسيمباەۆا "قازاقستاننىڭ ەرەكشەلٸگٸ - كٶپۇلتتى ەل, سوندىقتان ونى ساقتاۋىمىز كەرەك" دەسە, دەپۋتات احمەت مۋرادوۆ تا ەرٸپتەسٸنٸڭ سٶزٸن قولداپ, قازاقستاندا كٶپۇلتتىڭ ساقتالۋى "ستراتەگييالىق رەسۋرس" ەكەنٸن ايتقان.
رەسمي مەلٸمەت بويىنشا, 2012 جىلدان باستاپ قازاقستاننان كەتٸپ جاتقاندار كٷرت كٶبەيگەن.
ستاتيستيكا كوميتەتٸنٸڭ دەرەگٸنشە, 2018 جىلى ەلدەن كەتكەندەر 40 مىڭ ادامعا جەتٸپ, الدىڭعى جىلمەن سالىستىرعاندا 11 پايىزعا ارتقان. ولاردىڭ كٶبٸ رەسەيگە كٶشكەن.
سونىمەن قاتار, دارحان امانۇلى بۇل جيىندا اۋىل جاستارىنىڭ جاعدايىن جاقسارتۋ تەتٸكتەرٸن تٷسٸندٸردٸ.
«ٶزدەرٸڭٸز كٶرٸپ وتىرسىزدار, مەملەكەت باسشىسىنىڭ جاستار فورۋمىندا بەرگەن تاپسىرمالارىنىڭ بەرٸ دە اسا ماڭىزدى جەنە ولار ٶز دەڭگەيٸندە ورىندالاتىن بولادى. وسى تۇستا, مىنا جايتقا دا توقتالعىم كەلەدٸ. بۇل - اۋىل جاستارىنىڭ مەسەلەسٸ. شىنى كەرەك, وسى جەردە وتىرعان كٶبٸمٸز اۋىلدان شىقتىق. اۋىل - قازاقستاننىڭ التىن بەسٸگٸ, بٸز ٷشٸن ساكرالدى تۋعان جەر. جاستار جىلىندا بٸز اۋىل جاستارى مەسەلەسٸن جان-جاقتى شەشۋدٸڭ جولدارىن قاراستىرىپ جاتىرمىز. ونىڭ ٸشٸندە, ەلباسى ايتقانداي, «ديپلوممەن - اۋىلعا» باعدارلاماسى ارقىلى اۋىلعا بارعان جاستاردىڭ العاشقى جەردەماقىسى 100 ايلىق ەسەپتٸك كٶرسەتكٸشكە ٶسٸپ وتىر», - دەدٸ مينيستر.
ونىڭ سٶزٸنە قاراعاندا, ۆەدومستۆو اۋىلعا باراتىن جاس ماماندار ٷشٸن ارنايى كەسٸپورىنداردا كۆوتانىڭ سانىن ۇلعايتۋ, بٸلٸم گرانتتارىن كٶبەيتۋ مەسەلەسٸن قاراستىرىپ جاتىر.
«اۋىلدىق جەردەگٸ ينفراقۇرىلىمدى جاڭارتۋ, جاڭا جۇمىس ورىندارىن, مەديتسينالىق-مەدەني وشاقتاردىڭ قۇرىلىسىن سالۋ اۋماقتىق دامۋ جوسپارلارىنا ناقتى ەنگٸزٸلۋٸ قاجەت دەپ ەسەپتەيمٸز. سونداي-اق, «سەرپٸن», «جاس مامان», «جاس كەسٸپكەر» باعدارلامالارىنىڭ ماقساتى بٸر - اۋىل جاستارىنىڭ احۋالىن جاقسارتۋ. ەرينە, بٷگٸنگٸدەي ۋربانيزاتسييالىق, تسيفرلىق, جوعارى تەحنولوگييالىق دەۋٸردە ەشكٸمدٸ اۋىلعا بايلاپ وتىرا المايسىڭ. الايدا, تىم بولماعاندا, اۋىلدىڭ ەلەۋمەتتٸك-ەكونوميكالىق جاعدايى قالامەن تەڭەسە باستايتىن بولسا, اۋىلدىڭ وتى ەشقاشان ٶشپەيدٸ دەپ ويلايمىن!», - دەدٸ دارحان كەلەتاەۆ.
.jpeg)