Mamyrdyń 16-sy túnde Almaty oblysy Qarasai aýdanyndaǵy qoqys poligony órtenip, qalaǵa tútin iisi jaiyldy. Áleýmettik jeli qoldanýshylary resmi aqparattyń ýaqytynda taralmaýyna shaǵymdandy. Qala aýasynyń lastaný deńgeiin kórsetetin táýelsiz joba avtory "turǵyndardy kóshege shyqpai, terezeni jaýyp otyrýǵa" keńes berdi. Al qalalyq tótenshe jaǵdai departamenti "aýada qaýipti zattar mólsheri joǵarylamaǵanyn" aityp, turǵyndardy "messenjerlerde taraǵan jalǵan aqparatqa senbeýge" shaqyrdy.
Mamyrdyń 16-syna qaraǵan túni áleýmettik jeli qoldanýshylary Almaty qalasynda tútin men ys iisi taralyp, "demalý múmkin emes" ekenine shaǵymdandy. Mysaly, Basia Izrailovna esimdi qoldanýshy Facebook jelisinde "Keshe keshke Qaskeleńde qoqys poligony órtendi. Áýeli Bishkek jaqqa qarai tútin ketti. Jeldiń baǵyty ózgerip, tútin qala jaqqa qarai kóshe bastady..." dep jazdy.
Qalada tútin iisi ásirese qalanyń taýǵa jaqyn ornalasqan bóliginde qatty sezildi. Qala turǵyndary tańerteńgi saǵat onǵa deiin ystyń naqty sebebin bile almady.
Resmi aqparat mamyrdyń 16-sy tańerteńgi saǵat onǵa taman tarady. Almaty oblystyq tótenshe jaǵdailar departamentiniń habarlaýynsha, Qarasai aýdanyndaǵy Áitei aýylynan jeti shaqyrym jerdegi qoqys poligony túngi 2.00-den bastap órtene bastaǵan.
Departament ókili Erlan Qylyshbaevtyń aitýynsha, órt bir gektar aýmaqqa taraǵan. Qylyshbaevtyń sózinshe, órtenip jatqan poligon aýmaǵyna onǵa jýyq tehnika qum seýip jatyr. Tótenshe jaǵdailar komitetiniń ókili Nursultan Nurahmet "órtten zardap shekkender joq" dep habarlady.
Tilshimiz qalanyń ekologiialyq ahýalyna bailanysty "Qazgidrometke" habarlasyp kórip edi, esimin Aiza dep tanystyrǵan baspasóz qyzmetiniń ókili órtke bailanysty Almaty qalalyq ekologiia departamentine habarlasý keregin aitty. Al qalalyq ekologiia departamentiniń ókili Daniiar Qurmanbekov tańerteńgi saǵat 11 shamasynda tilshi suraǵyna bylai dedi:
"Qazir "Qazgidrometpen" birigip, bizdiń ekologiia departamentiniń zerthanasy statsionarlyq postarǵa shyǵyp, synaq (zamer) alady. "Qazgidromettiń" avtomattyq statsionarlyq posty "zattardyń joǵary mólsheri" bar dedi".
"Ne úshin órt týraly aqparat ýaqytynda taralmady?" degen suraqqa ol "bul oqiǵany ózderiniń tańerteń ǵana bilgenin" aitty.
- Ózińiz oilańyz, túngi saǵat ekide... ony bilgen de joqpyz. Tańerteń jumysqa kelgendei sondai málimetter boldy, - dedi Daniiar Qurmanbekov.
Táýelsiz ekologtar "Almaty qalasy aýasynyń lastaný deńgeiin kórsetedi" dep silteme beretin airkaz.org jobasy aýadaǵy PM 2.5 qaýipti bólshekter deńgeii Nur-Sultan ýaqytymen tańerteńgi saǵat 9 jarym shamasynda keibir aýdanda 133-ti kórsetip turdy.
- Bul - árbir tekshe metrge shaqqanda aýa quramyndaǵy PM 2.5 qaýipti bólshekter deńgeii. Ol neǵurlym joǵary bolsa, soǵurlym jaman. Táýligine ortasha qalypty norma - 25 mikrogramm. Ádette jyldyń bul mezgilinde 10 men 30-ǵa deiin bolady. Bul qalypty sanalady. Qysta jaǵdai nasharlap ketedi. Keshe, kesheniń arǵy kúni áldeqaida jaqsy bolatyn, - deidi joba avtory Pavel Aleksandrov.
"Qurylǵylaryńyz qanshalyqty dál derek beredi?" degen suraqqa azamattyq belsendi "qurylǵylarymnyń ólsheý dáldigi 10 paiyzdy quraidy. Iaǵni, eger PM deńgeii 50-di kórsetse, qurylǵylarym +-10 paiyz joǵary-tómen kórsetýi múmkin" deidi ol.
Azamattyq belsendi buǵan deiin Facebook-taǵy paraqshasynda aýa quramynda qaýipti zattar kóp bolǵandyqtan "azamattardy qatty qajet bolmaiynsha kóshege shyqpai, terezeni jaýyp otyrýǵa" keńes bergen edi.
Túske qarai Almaty qalalyq tótenshe jaǵdai departamenti turǵyndardy "aýada kúkirt totyǵynyń quramy 70 esege joǵarylady degen" messenjerlerde tarap jatqan aqparatqa senbeýge shaqyrdy.
"Qazgidromet" deregine súiengen tótenshe jaǵdai departamenti "aýada qaýipti zattar mólsheri joǵarylamaǵanyn" aitty.
"Osyǵan bailanysty Almaty qalalyq tótenshe jaǵdai departamenti respiratorlar men protivogaz qoldaný týraly nusqaýlyq bergen joq" delingen tótenshe jaǵdai departamenti taratqan habarlamada.
Departament Almaty turǵyndaryn oqiǵaǵa bailanysty qatty alańdamaýǵa shaqyrdy.
Resmi derek boiynsha, órtenip jatqan poligonǵa Almaty qalasynan shyqqan qoqys shyǵarylady.
"Qazir oblys ákiminiń tapsyrmasyna sai, Qarasai aýdanynyń ákimi jáne oblys ákiminiń birinshi orynbasary Lázzat Turlashov oqiǵa ornynda júr. Poligonǵa Almaty qalasynan shyqqan qoqys shyǵarylady. Qazir órtti sóndirý úshin oblys ákiminiń tapsyrmasyna sai, qosymsha qurylys tehnikalary jumyldyrylyp jatyr" dedi Almaty oblystyq tótenshe jaǵdai departamentiniń baspasóz hatshysy Ǵalymurat Júkel.
