Almaty qalasynyń bas memlekettik sanitar dárigeri Jandarbek Bekshin onlain brifing barysynda qaladaǵy epidemiologiialyq ahýal jaily aitty, dep habarlaidy "Ult aqparat".
Jyl basynan 26 sáýirge deiin qalada koronavirýstyń 33 230 jaǵdaiy tirkeldi. Byltyr 18,5 myń bolǵan. Iaǵni, 1,8 ese artyq. Ótken táýlikte 689 adam koronavirýs juqtyrǵan.
«Osy jyldyń sáýir aiynda aýrýshańdyq boljamdy túrde ósýin jalǵastyrýda. Epidemiianyń damý serpini 3-aptadaǵy pissemistik boljamǵa sáikes keledi. Boljam boiynsha 14 483 jaǵdai kózdelgen, al sáýirdiń alǵashqy úsh aptasynda virýs juqtyrǵan 13 397 oqiǵasy tirkeldi. Sondyqtan qaladaǵy epidemiologiialyq jaǵdai qazir kúrdeli. Sol sebepti shekteý sharalaryn jumsartqan joqpyz», - dedi Jandarbek Bekshin.
Sonymen qatar ol virýstyń qazirgi damý dinamikasynda simptomy bar naýqastar sanynyń kóbeigenin atap ótti.
«Biylǵy qańtar aiynda simptommen tirkelgen naýqastardyń úlesi 73% bolsa, búgingi tańda ol 90%-ǵa jetken. Bul aýrýdyń neǵurlym agressivti qozdyrǵyshynyń bolýyn rastaidy. Oǵan qosa virýstyń mýtatsiialanǵan shtamdary paida boldy», - dedi ol.
