Petropavlda budan bylai jer telimderi ashyq aýktsiondar arqyly satylatyn bolady. SQO ákimi Qumar Aqsaqalov jer qatynastary basqarmasynyń keńeitilgen alqa otyrysynda osylai dep málimdedi. Buryn jer satý saýdasy oblys ortalyǵynda ótkizilmeitin edi. Sonyń kesirinen qazir qalada bos jer ýchaskeleriniń tapshylyǵy baiqalady.
«Qalada bos jer telimi joqtyń qasy. Investorlarǵa jer taba almadyq. Bárin 10 jyl buryn satyp jibergen, aýktsionsyz. Endi jer telimderi tek ashyq aýktsion arqyly satylý kerek. Jerdi alǵannan keiin onda nysan turǵyzý qajet, óitpegen jaǵdaida qaitaryp alamyz», — dedi óńir basshysy.
Jer telimderin satý kezinde barlyq jaǵdailardy eskergen jón. Ásirese, demalys oryndarynda jerdi satýǵa tyiym salyndy.
«Adamdar demalatyn oryndarda jerdi múldem satýǵa bolmaidy. Bizde saiabaqta jerdi úi turǵyzýǵa satyp jibergen. Dál jaiaý júrginshiler ótetin jerge baspana turǵyzý esh qisynǵa kelmeidi», — dedi Qumar Aqsaqalov.
Jer qatynastary basqarmasynyń basshysy Erbolat Bekshenovtyń basty maqsaty — aýyl sharýashylyǵy maqsatyndaǵy jerlerdi kútip baptamaityn sharýashylyqtardan qaitaryp alý protsesin bastaý.
«Bul sharýalar ne jumys istemeidi, ne bireýlerge eńbek etýge mursha bermeidi. Jalaqy tólemeidi, tyńaitqyshtardy engizbeidi, tehnologiiany saqtamaidy. Osynyń kesirinen turǵyndar zardap shegýde. Mundai jer ielenýshilerdiń qatary jyl sanap azaiyp otyrý kerek. Zań ondai jumysty júrgizýge múmkindik berip otyr. Men sizdi osy qyzmetke sol úshin taǵaiyndadym», — dedi oblys ákimi.
Atap ótken jón, byltyr oblysta 188 myń gektar jer memlekettiń menshigine qaitarylǵan.
