Foto: almaty-marathon.kz
Ult.kz-te jihankez jýrnalist Dinara Bolattyń ózge paiymy
Jyldan jylǵa qazaq qoǵamy sportqa bet burýda. Árine árkimniń fitness zaldaryna turaqty baryp jattyǵýǵa ýaqyty da, qarjysy da jete bermes, degenmen kóp adamnyń esh qysymsyz, sanaly túrde óz betimen, ózine yńǵaily sport túrine kelip jatqany qýantady. Qazir qala saiabaqtarynda júgirip, velosiped teýip, eresekteri skandinav taiaqshalaryn alyp jaiaý júrip bara jatqan jyly kórinisti kún saiyn kórýge bolady.
Salaýatty ómir salty qoǵamdyq úlgige, qalalyq mádenietke ainalyp keledi. Elimizde sport súier jandar artqan saiyn jyl saiyn olardyń basyn biriktirer, shabytyna shabyt qosar Astana, Almaty marafondary, Ironman sekildi aýqymdy sharalar kóbeidi.
Qatysýshy sportshylar úshin bul jyl saiyn úlken qýanysh, ári óte jaýapty kezeń. Sportshylar bul mundai mańyzdy kúnderge birneshe ailap, jyldap daiyndalady.
Foto: almaty-marathon.kz
Marafondaǵy negizgi másele
Alaida mundai sharalarǵa qatysty qoǵam tarapynan túsinispeýshilikter de kezdesedi. Onyń negizgisi marafon ótetin kúnderi qalada paida bolatyn úlken keptelister.
Bul máseleniń sheshimi bar. Ol úshin mundai sporttyq sharanynyń uiymdastyrýshylary júgirý, velosiped tebý marshrýttaryn kólik aǵyny az ortalyq kóshelermen ótkizýdi josparlaýlary kerek. Odan bólek halyqqa aldyn ala áleýmettik jeli, sms habarlama taratý arqyly kólik qozǵalysy jabylatyn kósheler, avtobýstardyń ýaqytsha ózgertilgen qozǵalys shemasyn eskertse óte durys bolar edi. Jyldan jylǵa marafon uiymdastyrýshylary burynǵy qatelikterdi eskerip, sporttyq sharalardy turaqty ótkizetin álemdik mega qalalardan úlgi alady degen úmit bar.
Basqa elderdegi qurmet
Álemdik qalalar demekshi Boston, Niý-Iork pen Tokio, Berlinde marafon ótetin kúnder úlken mereke. Qalaǵa erekshe atmosfera ornaidy. Qala laiyq bezendirilip, mýzyka oinap, turǵyndar sol sportshylar sezinetin rýhty birge sezinedi. Ár turǵyn balkonnan nemese sportshylarǵa arnalǵan jolaqtyń boiynda jankúier retinde plakat ustap, ne sý berip marafonǵa qoldaý kórsetedi.
Ózge paiym
Sporttyq sharalar durys uiymdastyrylsa qalanyń rýhani, mádeni serpilýine úlken septik. "Búgin qalada marafon eken" dep beijai qaramai, mundai sharalardy qoldaý, túsiný jáne oǵan jankúier, volonter, kórermen retinde qatysý sol qalada turyp jatqan azamattardyń jańa, paidaly ózgeristerge sanasy ashyqtyǵyn kórsetedi. Ýaqytsha qolaisyzdyqqa qazir túsinistikpen qarap, qoldap, bolashaqta naǵyz sport mádenieti qalyptasqan qalalar bedelin qalyptastyrýǵa bolady.
Dinara Bolat
.jpg)
