Kafede tóbelespek bolǵan sairamdyq sheneýnik pen politseige qatysty qyzmettik tekserý bastaldy, dep habarlaidy QazAqparat.
Áleýmettik jelide laýazymdy tulǵalardyń kafede eregisip jatqandyǵy týraly video tarady. Onda tórt-bes jigittiń bir-birine bylapyt sózder aityp, tóbelespek bolǵandaryn kórýge bolady. Kei aqparat quraldary videodaǵy azamattar Sairam aýdany, Aqsýkent aýyldyq okrýgi ákiminiń orynbasary Erlan Orazbaev pen Sairam aýdandyq anyqtaý bóliminiń bastyǵy Nurjan Sultanbaev jáne Sairam AIIB anyqtaý bóliminiń qyzmetkeri Rýslan Qainarov ekendigin jazýda.
Búgin Túrkistan oblysy politsiia departamentiniń baspasóz qyzmeti oqiǵaǵa qatysty, pikir bildirdi.
«Bul oqiǵanyń Sairam aýdanynda bolǵany anyqtaldy. Beinejazbadaǵy janjal Túrkistan oblysy Politsiia departamentiniń nazaryna alynyp, qyzmettik tekserý jumystary bastaldy. Qosymsha mán-jai habarlanatyn bolady» - delingen habarlamada.
Al, Túrkistan oblysy ákimi baspasóz qyzmetiniń jetekshisi Mira Múslim de aýyldyq ákim orynbasaryna qatysty qyzmettik tekserý júrgizilip jatqanyn jetkizdi. Aqsýkent aýyldyq okrýgi ákiminiń orynbasary Erlan Orazbaev densaýlyq jaǵdaiyna bailanysty emdelip jatqandyqtan, ázirge naqty sheshim qabyldanbaǵan.
