Qazaqstanda kadr tapshylyǵy baiqalatyn óńirlerge erikti túrde qonys aýdarý baǵdarlamasy jańartylyp, memlekettik qoldaý kólemi edáýir artady. Eńbek jáne halyqty áleýmettik qorǵaý ministrliginiń málimetinshe, endi ekonomikalyq utqyrlyq sertifikatynyń eń joǵary mólsheri 7 mln teńgege deiin (1 625 AEK) ulǵaitylady. Bul qarjyny qatysýshylar jańa óńirden jeke turǵyn úi satyp alýǵa paidalana alady, dep habarlaidy ult.kz.
Jańartylǵan baǵdarlama azamattardyń tek qonys aýdarýyna ǵana emes, jańa jerde turaqty ómir súrýine, baspanaly bolyp, tez beiimdelýine jaǵdai jasaýǵa baǵyttalǵan.
Turǵyn úi sertifikatynan bólek, qonys aýdarýshylarǵa kóshý shyǵyndaryna sýbsidiia beriledi, turǵyn úidi jaldaý jáne kommýnaldyq qyzmetter aqysy óteledi. Sondai-aq memleket jańa óńirde jumysqa ornalasýǵa qoldaý kórsetip, azamattarǵa kóshpei turyp-aq jumys berýshini tańdaý múmkindigin usynady. Ol úshin qabyldaýshy óńirlerde turaqty túrde bos jumys oryndary jármeńkeleri uiymdastyrylady.
Baǵdarlamaǵa qatysýshylardyń qatary da keńeitildi. Endi memlekettik qoldaý tek jumyssyz azamattarǵa ǵana emes, eńbek naryǵynda suranysqa ie mamandarǵa, sondai-aq sharýa jáne fermer qojalyqtarynyń basshylaryna da qoljetimdi bolady.
Baǵdarlama tolyq tsifrlyq formatqa kóshirilgen. Azamattar migration.enbek.kz portaly arqyly onlain ótinim berip, óńirler kartasymen, suranysqa ie mamandyqtar tizimimen tanysyp, ózine qolaily bos jumys ornyn tańdai alady.
Aita keteiik, bul baǵdarlama 2017 jyldan beri júzege asyrylyp keledi. Osy ýaqyt ishinde oǵan 73,9 myń adam qatyssa, olardyń 31 myńy turaqty jumysqa ornalasqan.
