Búgin «Nur Otan» partiiasy Tóraǵasynyń Birinshi orynbasary Máýlen Áshimbaevtyń tóraǵalyǵymen «Jas Otan» jastar qanaty Ortalyq keńesiniń otyrysy ótti. Kún tártibinde uiymnyń jańa tóraǵasyn sailaý máselesi qaraldy.
Otyrysty ashqan «Nur Otan» partiiasy Tóraǵasynyń Birinshi orynbasary «Jas Otan» jastar qanatyn partiianyń negizgi tiregi dep atady.
- Qazaqstannyń barsha jastarymen jumys isteýde, olarǵa Elbasy saiasatyn túsindirýde, jas býyndy qoǵamdyq is-sharalarǵa jumyldyryp, igi isterge baǵyttaýda «Jas Otan»-nyń atqarar róli zor. Sondyqtan jasotandyqtardy Elbasynyń senimdi kómekshileri dep aitýǵa tolyq negiz bar, - dedi Máýlen Áshimbaev.
Sondai-aq ol Tuńǵysh Prezidentimizdiń bastamasymen biyl «Jastar jyly» dep jariialanǵanyna nazar aýdaryp, osy baǵyttaǵy jumystardy júzege asyrýǵa «Jas Otan» jastar qanatynyń belsendi úles qosatynyna senim bildirdi.
Odan bólek, Máýlen Áshimbaev osy ýaqytqa deiin «Jas Otan»-nyń tóraǵasy bolyp kelgen Daniiar Súndetbaevqa nátijeli eńbegi úshin barsha jasotandyqtardyń atynan alǵys bildirdi.
- Daniiar Súndetbaevtyń tóraǵalyǵy kezinde «Jas Otan» jańa biikke kóterilip, birqatar tyń jobalar qolǵa alyndy. Jastar qanatynyń jańa, zamanaýi formattaǵy IV sezi uiymdastyryldy. Sondyqtan Daniiar baýyrymyzǵa atqarǵan qyzmeti úshin alǵys bildirip, aldaǵy isterine sáttilik tileimiz, - dedi Máýlen Áshimbaev.
Aita keteiik, sońǵy eki jyl boiy elimizdegi jasotandyqtardyń basshysy bolyp kelgen Daniiar Súndetbaev shetelde bilimin jalǵastyrý týraly sheshim qabyldap, óz erkimen qyzmetinen bosatyldy. Soǵan bailanysty «Jas Otan» jastar qanatynyń Ortalyq keńesi Daniiar Súndetbaevtyń ókilettigin toqtatý týraly sheshimdi qoldap daýys berdi.
Osyǵan orai «Nur Otan» partiiasy Tóraǵasynyń Birinshi orynbasary «Jas Otan» jastar qanatynyń tóraǵalyǵyna búginge deiin osy uiymnyń atqarýshy hatshysy bolyp eńbek etip kelgen Dáýlet Káribektiń kandidatýrasyn usyndy. Ortalyq keńes músheleri bul usynysty talqyǵa salyp, nátijesinde biraýyzdan qoldaý bildirdi. Soǵan sáikes Dáýlet Káribek «Jas Otan» jastar qanatynyń tóraǵasy bolyp sailandy.
- Dáýlet Káribek 2017 jyldan beri «Jas Otan» jastar qanatynyń atqarýshy hatshysy bolyp qyzmet atqaryp keledi. Qoǵamdyq jumystarǵa belsene qatysyp, tabandylyǵymen tanylǵan ol jastar saiasatyna qatysty kóptegen tyń usynystarymen de kózge tústi. Sonyń nátijesinde «Daryn» memlekettik syilyǵynyń laýreaty atanyp, «Nur Otan» partiiasy Saiasi keńesiniń múshesi bolyp sailandy. Sondyqtan Dáýlet bul qyzmetti nátijeli atqarady dep senemin, - degen Máýlen Áshimbaev «Jas Otan»-nyń jańa tóraǵasyna aldaǵy qyzmetinde tabys tiledi.
Óz kezeginde Dáýlet Káribek partiia basshylyǵyna bildirgen senim úshin rizashylyǵyn jetkizip, ózine júktelgen mindetti múltiksiz oryndaýǵa ýáde berdi.
Otyrys sońynda «Nur Otan» partiiasy Tóraǵasynyń Birinshi orynbasary elimizdiń aldynda úlken saiasi naýqan turǵanyna nazar aýdardy.
- Aldymyzda Prezident sailaýy tur. Elbasynyń tapsyrmasymen partiiamyzdyń bul naýqanǵa belsene qatysatyny belgili. Búgin Ortalyq sailaý komissiiasy Qasym-Jomart Kemeluly Toqaevty Qazaqstan Respýblikasynyń Prezidenttigine kandidat retinde resmi túrde tirkedi. Endi sanaýly kúnderden keiin úgit-nasihat jumystary bastalady. Osyndai aýqymdy jumystarda jasotandyqtardan belsendilik kútemiz, - dedi Máýlen Áshimbaev.
.jpeg)