Izrail úkimeti koronavirýsqa bailanysty engizilgen karantin sharalaryn qatańdatý sheshimin qabyldady. Eldiń premer-ministri Biniamin Netaniahý infektsiianyń jańa tolqyny Izraildi «orǵa» itermelep jatqanyna qatysty alańdaýshylyq bildirdi, dep habarlaidy Reuters agenttigi.
Bir apta buryn, 18 qyrkúiekte Izrail karantin sharalaryn qaita engizgen. Apta ishinde 9 million halqy bar elde koronavirýs juqtyrýdyń 7 myń oqiǵasy tirkeldi.
Erteń, 25 qyrkúiek kúni elde engiziletin jappai karantin jaǵdaiynda tek azdaǵan kásiporyndarǵa jumys isteýge ruqsat etilgen – bul qarjy institýttary, densaýlyq saqtaý uiymdary, azyq-túlik dúkenderi, kólikke janarmai quiý stansalary, sondai-aq aýylsharýashylyq kásiporyndary.
Sondai-aq, saparǵa shyǵýǵa qosymsha shekteýler engiziledi – endi úiden tek azyq-túlik pen dári-dármek satyp alý úshin, sondai-aq keńesege deiin jetý úshin ǵana shyǵýǵa bolady. Izraildegi mektepter áli jabyq.
Atap óteiik, Izrail úkimeti jappai karantindi taǵy eki aptaǵa engizý máselesin birneshe saǵat boiy talqylaǵan.
«Sońǵy eki kún biz sarapshylardan bul kúrdeli sheshimdi shuǵyl túrde qabyldamasaq, ordyń shetinde qalyp qoiatynymyzdy estidik», - dep málimdedi B.Netaniahý ministrler kabinetine arnaǵan sózinde.
Izraildiń densaýlyq saqtaý ministrligi sońǵy táýlikte elde koronavirýs juqtyrý oqiǵalarynyń sany 6 667-ge jetip, buryn engizilgen karantinge qaramastan, 200 myń oqiǵa kórsetkishinen asqanyn málim etti. Izrailde karantin birinshi ret naýryz aiynda engizilip, mamyrǵa deiin sozylǵan.
