Shymkentte jańa týǵan náresteniń ólimine áieldiń týystary dárigerlerdi kinálap otyr. Týystarynyń aitýynsha, áiel birneshe ret dárigerlerden shara qoldanýdy suraǵan, dep habarlaidy Ult.kz Almaty telearnasyna silteme jasap.
Qala turǵyny bir aýrýhanada balasynan aiyryldy. Týystary meditsina qyzmetkerlerin salǵyrttyq tanytty dep aiyptap, oqiǵany jan-jaqty tekserýdi surap otyr. Náreste jatyr ishinde shetinep ketken. Bosanýǵa sanaýly kúnder qalǵanda osyndai qaiǵyly jaǵdai oryn alǵanyn áiel kóz jasymen jetkizdi. Onyń aitýynsha, ýaqytynda kesir tiligi jasalǵanda, bul tragediianyń aldyn alýǵa bolar edi.
Shymkent turǵyny Nazerke Pirimbetova qalalyq №2 aýrýhanada bosanýy tiis bolǵan. Ol meditsinalyq mekemege aldyn ala jatqyzylǵan. Týystarynyń aitýynsha, Nazerke ol jerde bir aidan astam ýaqyt jatqan. Bosaný ýaqyty jaqyndaǵan saiyn onyń jaǵdaiy nasharlai bergen. 30 jastaǵy áiel birneshe ret dárigerlerden shara qoldanýdy ótingen. Alaida, týystarynyń sózinshe, oǵan tek shydaýǵa keńes bergen. Nátijesinde, kópten kútken sábimen qaýyshýdyń ornyna, áiel balasyn múlde kóre de almaǵan — náreste jatyrda shetinep ketken.
«Ony 5-6 ret tekserdi, KT-sy durys shyqpai júrdi. Túnde mazasyzdanatyn. Biz munyń bárin dárigerlerge aittyq, biraq olar múlde qaraǵan joq. Sonyń saldarynan men balamnan aiyryldym», – deidi zardap shekken áieldiń kúieýi Abai Berdibek.
Týystarynyń aitýynsha, náreste shetinegennen keiin dárigerler naqty túsinikteme bere almaǵan. Kerisinshe, jaýapkershilikti basqa jaqqa aýdaryp, «bala tolyq jetilmegen» degen ýáj aitqan. Sonymen qatar, olar áieldi jýrnalisterge suhbat bermeýge úgittep, tipti palatada ustap qalǵan, deidi jaqyndary.
«Palataǵa kirsem, onda bas dárigerdiń mindetin atqarýshy, akýsherler, medbikeler jáne tergeýshi jinalyp otyr. Olar qaryndasyma sábidi máiithanaǵa bermeýdi aityp, ondaǵy mamandar balanyń denesin tilip tastaidy dep qorqytqan. Menińshe, olar múrdeni ashýǵa jol bermei, izdi jasyrýǵa tyrysqan. Isti jabyq kúide qaldyrmaq boldy», – deidi zardap shegýshiniń aǵasy Asanáli Pirimbetov.
Qazir fakti boiynsha qylmystyq is qozǵaldy. Politsiia dárigerlerdiń is-áreketin tekserip jatyr. Balanyń denesi, platsenta jáne kindik ishinara saraptamaǵa jiberildi. Ol náresteniń naqty neden shetinegenin anyqtaýy tiis. Al qalalyq densaýlyq saqtaý basqarmasy kesir tiligi josparlanǵanyn málimdedi.
«Kesir tiligin osy aptada jasaý josparlandy, sebebi aldymen uryqtyń ókpesin daiyndaý qajet boldy. Biraq platsentanyń ózindegi jáne onyń tamyrlaryndaǵy máselelerge bailanysty platsentarlyq qyzmettiń dekompensatsiiasy oryn alǵan. Sonyń saldarynan 3-nen 4 jeltoqsanǵa qaraǵan túni antenataldyq ólim tirkeldi», – dedi Qoǵamdyq densaýlyq saqtaý basqarmasynyń bólim jetekshisi Inna Glazebnaia.
Qaiǵyly oqiǵadan keiin perzenthanada baqylaý kúsheitildi. Meditsinalyq jáne farmatsevtikalyq baqylaý komiteti oqiǵanyń barlyq jai-japsaryn anyqtaý úshin tekseris júrgizýde.
