Búgin QR Premer-Ministriniń orynbasary Imanǵali Tasmaǵambetov QR Parlamenti Senatynyń depýtattary, onyń ishinde Birǵanym Áitimova jetekshilik etetin áleýmettik-mádeni damý jáne ǵylym jónindegi komitettiń múshelerimen kezdesti, dep habarlaidy "Ult aqparat" QR Premer-Ministriniń resmi saityna silteme jasap.
Kezdesý barysynda áleýmettik salaǵa qatysty mańyzdy suraqtar talqylandy. Vitse-premer I. Tasmaǵambetov atap ótkendei, ótken jyly Parlamentke bilim, densaýlyq jáne mádeniet máseleleri boiynsha 7 qorytyndy joldandy.
Balalardy balabaqshaǵa kezekke qoiýdy jáne joldama berýdi avtomattandyrý, mektepke deiingi bilim berý nysandarynyń jelisin ulǵaitý siiaqty mektepke deiingi bilim jáne tárbie berý máseleleri qaraldy, onyń ishinde aǵymdaǵy jyly memlekettik-jekemenshik áriptestik aiasynda 41,9 myń jańa oryndar qurý josparlanyp otyr.
Sondai-aq, orta bilim berýge qatysty apatty jáne úsh aýysymdaǵy mektepterdiń ornyna 56 nysan qurylysyn salý, 2, 5, 7-synyptarda jańartylǵan baǵdarlamamen bes kúndik oqý aptasyna kóshý, bitirý jáne oqýǵa túsý emtihandaryn bólý arqyly jańa formatta UBT ótkizý suraqtary qaraldy.
Aita keteiik, aǵymdaǵy jyly mekteptegi tamaqtaný, qural-jabdyq, kiim úlgisi, sport jáne basqa da balalardyń qaýipsizdigi, densaýlyǵy men ál-aýqatyna qatysty standarttar men erejeler qaita qaralady.
Kásiptik-tehnikalyq bilim salasynda «jalpyǵa birdei tegin kásiptik-tehnikalyq bilim» jobasyn júzege asyrý qarastyrylýda. Aldyn-ala málimet boiynsha ol 47,3 myń adamdy qamtidy, 65 jumysshy mamandyǵy boiynsha jańa modýldik baǵdarlama ázirlenip, jańa baǵdarlamany júzege asyrý úshin 5 200 oqytýshy men óndiristik oqytý sheberleri oqytyldy.
Joǵary jáne joǵarǵy oqý ornynan keiingi bilim salasynda korporativti basqarý qaǵidasy engizilip, ishki aýdit qyzmeti qurylady. JOO-nyń uiymdastyrý-quqyqtyq formasy ózgerip, kommertsiialyq emes aktsionerlik qoǵamdarǵa ótedi. JOO-na memlekettik attestatsiia halyqaralyq attestatsiiamen aýystyrylady.
Sonymen qatar, densaýlyq saqtaý salasynda áleýmettik meditsinalyq saqtandyrý qory jáne onyń filialdaryn qurý máselesi kóterildi. Osy jyly meditsinalyq oqý oryndarynda pediatriia fakýlteti ashylady jáne pediatriia ýchaskeleri qalpyna keltirilip, óńirlerdegi barlyq emhanalarda elektrondy kezek engiziledi. Halyqaralyq standarttarǵa sáikes kezeń-kezeńimen onkologiialyq dispanserler bazasynda ortalyqtandyrylǵan himiialyq preparattardy qurý kabinetteri ashylady. Sondai-aq, dári-dármek baǵasyna regressivti ólshem engizý máselesi qaraldy.
