© Sputnik / Vladislav Vodnev
Vitse-premer Eraly Toǵjanov Úkimet músheleri issaparǵa jeke ushaqpen ushyp, milliondaǵan aqsha jumsaidy degen qaýesetti joqqa shyǵardy, dep habarlaidy Sputnik Qazaqstan agenttigi.
"Meniń qyzmettik kóligim – Mersedes, baǵasyn bilmeimin. Ministrler jeke ushaqpen ushady degendi estigen joqpyn. Jýyrda men Jambyl oblysyna reistik Scat-pen ushtym. Ol jerde bárimen birge otyrasyń, biznes joq, búkil oryn birdei", -dep jaýap berdi Toǵjanov úkimet kýlýarynda jýrnalisterdiń suraǵyna.
Aitýynsha, keide jaqyn óńirlerge avtokólikpen barady. Mysaly, Qaraǵandyǵa solai barǵan.
"Men ár ministrdi baqylamaimyn. Ministrlerdiń jeke ushaǵy joq, sol sebepti olar reistik ushaqpen ushady", - dep naqtylady vitse-premer.
Buǵan deiin áleýmettik jelide úkimet músheleriniń bir saparyna biýdjetten 10 million teńge jumsalady degen aqparat taraǵan bolatyn.
