Qazaqstannyń 150-den astam azamaty Ispaniiadan otanyna oraldy, dep habarlaidy "Ult aqparat" QR Syrtqy ister ministrligine silteme jasap.
«28 naýryzda Qazaqstannyń 44 azamaty (kópshiligi stýdentter men birneshe bala) «Belavia» áýekompaniiasynyń reisimen Barselona áýejaiynan Minsk arqyly Nur-Sultan men Almatyǵa ushyp ketti. Bul Madridtegi Qazaqstan Elshiligi jáne Barselonadaǵy konsýldyq qyzmetkerleriniń tiimdi jumysynyń arqasynda múmkin boldy. Olar Ispaniiadaǵy azamattarymyzǵa kúndelikti kómek kórsetýdi jalǵastyrýda.
Ispaniiada pandemiianyń jyldam taralýy jaǵdaiynda (72 myńnan asa adam juqtyrǵan) jáne reisterdiń basym kópshiligi toqtaǵan kezde, Qazaqstannyń Ispaniiadaǵy Elshiligi Madridtegi Belarýs Elshiligi jáne «Belavia» áýekompaniiasynyń basshylyǵymen Barselonadan ushýǵa biletti satyp alǵan barlyq qazaqstandyq jolaýshylardy otyrǵyzýdy qamtamasyz etý úshin 28 naýryzda ushatyn áýe kemesin úlkenirek túrine aýystyrý týraly kelisimge jetti», - delingen málimette.
Qazaqstandyq diplomattar birneshe kún boiy otandastardy elge qaitýdyń joldary týraly dereý habarlap otyrǵan.
«Tez arada biletterdi satyp alýǵa, jaǵdaidy boljaý qiyn kezde ushýdy keshiktirmeý kerektigi týraly aqparattandyryp, múmkindikti paidalanýǵa shaqyrdy. Búgingi tańda qazaqstandyq diplomattardyń kómegimen 150-den astam qazaqstandyq Ispaniiadan túrli reistermen ushyp ketti. Ispaniiaǵa emdelýge kelgen jáne kámeletke tolmaǵan Qazaqstan Respýblikasynyń azamattaryna erekshe kóńil bólinedi», - dedi ministrlikten.
