Ózbekstan bas prokýratýrasy eldiń tuńǵysh prezidenti Islam Karimovtiń úlken qyzy Gúlnara Karimova "jaza óteý tártibin buzǵany" úshin sot úkimimen túzeý koloniiasyna jiberilgenin habarlady. Karimovanyń qyzy Iman "anamdy urlady" dep bilikti aiyptady.
"JAZA ÓTEÝ ShARTYN QASAQANA BUZDY"
Ózbekstan bas prokýratýrasy 5 naýryzda Iashnabad aýdandyq qylmystyq ister jónindegi soty "jaza óteý sharty men tártibin qasaqana buzǵan" Gúlnara Karimovanyń jazasyn ózgertkenin habarlady. Ishki ister ministrligi janyndaǵy jazany oryndaý qyzmetiniń usynysy boiynsha, sot 2018 jyldyń maýsymynan beri úiqamaqta ustalǵan Gúlnara Karimovany túzeý koloniiasyna jibergen.
46 jastaǵy Gúlnara Karimovany sol kúni Tashkenttegi qyzynyń páterinen bilik ókilderi alyp ketken. Bul týraly onyń qyzy Iman Karimova Instagram áleýmettik jelisi arqyly jazdy.
"Shamamen saǵat 19:00 kezinde ózbek prokýratýrasynyń qyzmetkerleri Tashkenttegi páterime basa-kóktep kirip keldi. Merziminen buryn shartty túrde bostandyqqa shyqqan anam osy páterde 2018 jyldyń maýsym aiynyń sońynan beri turady. Olardyń [prokýratýra ókilderi – red.] biri áýeli "basshylyq" atynan anama qoqan-loqy jasap, birneshe minýttan soń prokýratýranyń ózge qyzmetkerlerimen birge jetip kelip, anamdy belgisiz jaqqa alyp ketti" dep jazdy ol.
Instagram-daǵy akkaýntynda bulyńǵyr birneshe sýret jariialaǵan Iman Karimova "anamdy urlap áketti" dep bilikti aiyptaǵan.
Ózbekstan bas prokýratýrasy Gúlnara Karimova 2018 jyly qarashanyń 22-i kúni páterinen óz betimen shyǵyp ketkennen keiin oǵan eskertý jasalǵanyn aitady.
"Eskertýden qorytyndy shyǵarmaǵan G.Karimova jaza óteý sharty men tártibin qasaqana buzýyn qoimaǵan. Ol bailanys quraldaryn, sonyń ishinde internetti birneshe ret paidalanǵan; qylmystyq is boiynsha anyqtalǵan ózi keltirgen ziiandy óteýge belsendi túrde bóget jasaǵan" deidi prokýratýra.
Bilik Karimovanyń bailanys quraldaryn qandai maqsatqa paidalanǵanyn ashyp aitpaǵan.
"BILIK MURAGERINIŃ" TUTQYNǴA AINALÝY
Osydan onshaqty jyl buryn, Ózbekstandy ýysynda ustaǵan prezident ákesiniń kózi tirisinde Gúlnara Karimova jarqyraǵan kiimi jáne ánshilik ónerimen jurt nazarynan túspeitin. Diplomatiialyq salada qyzmet atqardy. Kei sarapshylar ony eldi 27 jyl basqaryp, 2016 jyly qyrkúiekte qaitys bolǵan Islam Karimovtiń biliktegi murageri sanaityn.
2013 jyly shvetsiialyq basylymdarda Ózbekstanǵa investitsiia salýǵa yqylas bildirgen halyqaralyq kommýnikatsiialyq kompaniialar Gúlnara Karimovaǵa para berýge májbúr bolǵany týraly jaza bastady. Ortalyq Aziiadaǵy halqy eń kóp postsovettik elge mobildik bailanys qyzmetin usynatyndar qyzyǵa qaraityn. Batys basylymdarynda jariialanǵan shýly maqalalardan keiin Shvetsiia, Shveitsariia, Niderland, AQSh jáne basqa elderde tergeý bastalyp, iri telekommýnikatsiialyq kompaniialardyń is-áreketin teksergen.
2014 jyly Gúlnara Karimova kóptiń kózine túspei ketti. Keiin Ózbekstan biligi jemqorlyq jáne basqadai aiyptar taǵylyp, ústinen is qozǵalǵan Gúlnara Karimovanyń úiqamaqta otyrǵany týraly aqparat taratty. 2015 jyly tamyzda Tashkent soty Karimovany salyqtan jaltardy, qarjy jymqyrdy, bopsalady jáne offshor kompaniialarynyń qujattaryn joidy dep aiyptap, bas erkindigin bes jylǵa shektegenin Ózbekstan resmi organdary tek eki jyldan keiin habarlaǵan edi.
Gúlnara Karimovaǵa tiesili delingen qarjynyń kóbi - 800 million dollar Shveitsariia bankterinen tabylyp, buǵattalǵan. Karimovaǵa para bergenin moiyndaǵan gollandiialyq telekommýnikatsiialyq kompaniia AQSh pen Niderlandqa 795 million dollar aiyppul tóleýge kelisti. Bul AQSh tarihyndaǵy eń iri aiyppuldardyń biri boldy.
Ótken aida Shvetsiia soty Telia (burynǵy TeliaSonera) telekommýnikatsiialyq kompaniiasynyń burynǵy úsh jetekshisin aqtaý týraly sheshim shyǵarǵan. Olarǵa Gúlnara Karimovaǵa asa iri kólemde para bergen degen aiyp taǵylǵan bolatyn.
